प्रकाशित मिति : श्रावण २१, २०८२ बुधबार
अमेरिकाको जर्जिया राज्यमा रहेको सैन्य आधार शिविरमा मा आर्मी सार्जेन्टले गोली चलाउँदा पाँच जना अमेरिकी सैनिक घाइते भएका छन् । त्यसपछि अन्य सैनिकले आक्रमणकारीलाई नियन्त्रणमा लिएपछि थप क्षति हुन पाएन ।
आक्रमणकारी सैनिक क्वोर्नेलियस राडफोर्ड रहेको सैनिक अधिकारीहरूले बताएका छन । उनले आफ्नो निजी हाते हतियार प्रयोग गरी आफ्नै सहकर्मी सैनिकलाई लक्षित गर्दै गोली चलाएका थिए।
फोर्ट स्टुअर्ट नामको यो सैन्य आधार अटलान्टाबाट करिब ३८६ किलोमिटर दक्षिण–पूर्वमा पर्छ । गोलीकाण्डपछि पुरै आधार शिविरमा लकडाउन गरिएको थियो।
ती सबै पाँच जना घाइते सैनिकहरूको अवस्था अहिले स्थिर रहेको छ । उनीहरूको उपचार भइरहेको ३ औं इन्फ्यान्ट्री डिभिजनका कमान्डिङ जनरल ब्रिगेडियर जनरल जोन लुबासले जानकारी दिए । घाइते मध्ये तीन जना घाइते सैनिकको शल्यक्रिया गरिएको छ।
जनरल लुबासले आक्रमणकारी सैनिक पूर्व लडाइँ क्षेत्रमा नखटिएको बताए । साथै, उनले आक्रमण रोक्न तत्काल र निडरतापूर्वक प्रतिक्रिया जनाएका सैनिकहरूलाई धन्यवाद दिए।
क्वोर्नेलियस राडफोर्ड २ औं ब्रिगेड कम्ब्याट टिममा कार्यरत ड्युटी सैनिक थिए । उनलाई हाल थुनामा राखिएको छ । सेनाको आपराधिक अनुसन्धान टोलीले सोधपुछ गरिरहेको छ । हमलाको कारण भने अहिलेसम्म खुलाइएको छैन।
जनरल लुबासका अनुसार राडफोर्डलाई पहिले एकपटक ड्राइभिङ अन्डर द इन्फ्लुएन्स को अभियोगमा स्थानीय प्रहरीले पक्राउ गरेका थिए ।
आक्रमणमा प्रयोग गरिएको पिस्तोल सेनाको नभएको बताइएको छ । सैनिक आधार शिविरमा निजी हतियार कसरी प्रवेश गर्यो भन्नेबारे अनुसन्धान भइरहेको छ।
सामाजिक सञ्जालमा साझा गरिएको भिडियोमा सैनिकहरूलाई घटनास्थलबाट सुरक्षित स्थानमा लगिएको देखिन्छ।
राष्ट्रपति डोनाल्ड ट्रम्पले ह्वाइटले ‘यो एउटा अमानवीय घटना हो र अपराधीलाई कानुनी रूपमा कडाभन्दा कडा सजाय दिइनेछ। हामी यो घटना बिर्सदैनौ’भनेका छन ।
झण्डै २ लाख ८० हजार एकड क्षेत्रफलमा फैलिएको फोर्ट स्टुअर्ट मिसिसिपी नदीको पूर्वतर्फ रहेको सबैभन्दा ठूलो अमेरिकी सेनाको आधार हो ।
त्यहाँ करिब १० हजार मानिस बसोबास गर्छन् । यो हाइन्सभिल नामक सहरमा पर्छ । साभान्ना शहरबाट करिब ६४ किलोमिटर दक्षिण–पश्चिममा रहेको छ ।