प्रकाशित मिति : १२ फाल्गुन २०८२, मंगलबार
अमेरिकामा विद्यालय सुरक्षा अनुदान तथा विश्वविद्यालयहरूमा प्राप्त हुने विदेशी आर्थिक सहयोगसम्बन्धी निगरानीको जिम्मेवारी अन्य निकायमा सारिएको छ।
डोनाल्ड ट्रम्प नेतृत्वको प्रशासनले अमेरिकी शिक्षा मन्त्रालयलाई क्रमशः कमजोर बनाउँदै लैजाने प्रयास गरिरहेको सन्दर्भमा यो निर्णय भएको अनुमान गरिएको छ। उक्त घोषणा सोमबार सार्वजनिक गरिएको हो।
यस निर्णयअनुसार विद्यालयमा हुने गोलीकाण्ड र विद्यार्थी मानसिक स्वास्थ्य कार्यक्रमसम्बन्धी कार्यहरू अब ‘युनाइटेड स्टेट्स डिपार्टमेन्ट अफ हेल्थ एन्ड ह्युमन सर्भिसेस’ (स्वास्थ्य तथा मानव सेवा विभाग) ले सम्हाल्नेछ। त्यस्तै, विश्वविद्यालयहरूमा विदेशबाट आउने अर्बौँ डलर बराबरका उपहार तथा सम्झौताहरूको अनुगमनमा ‘युनाइटेड स्टेट्स डिपार्टमेन्ट अफ स्टेट’ (विदेश मन्त्रालय) ले शिक्षा मन्त्रालयलाई सहयोग गर्नेछ।
शिक्षा मन्त्री लिन्डा म्याकमहोनले संघीय शिक्षा प्रशासनलाई विभाजन गरी अधिकार राज्यहरूलाई फिर्ता गर्ने क्रममा नयाँ साझेदारीहरू निर्माण गरिएको बताएकी छन्। उनले यी साझेदारीहरू प्रभावकारिता, समन्वय र सुधारका दृष्टिले व्यावहारिक कदम भएको उल्लेख गरिन्।
यसअघि ट्रम्प प्रशासनको शिक्षा मन्त्रालय पुनर्संरचना योजनाप्रति दुवै दलका सांसदहरूले असन्तुष्टि जनाएका थिए। तथापि, पछिल्लो निर्णयले स्वास्थ्य मन्त्री रोबर्ट एफ. केनेडी जुनियर नेतृत्वको निकायलाई देशव्यापी विद्यालय हिंसासम्बन्धी सरकारी योजना व्यवस्थापनको नयाँ जिम्मेवारी दिएको छ।
स्वास्थ्य तथा मानव सेवा विभागअन्तर्गतको ‘बालबालिका तथा परिवार प्रशासन’ ले अब विद्यालय सुरक्षा कार्यक्रमका लागि छुट्याइएका करोडौँ डलरको कोष परिचालन गर्नेछ। साथै, विद्यार्थीका लागि मानसिक स्वास्थ्य सेवा प्रदायकको सङ्ख्या वृद्धि गर्ने तथा हिंसात्मक वा आघातजन्य घटनापछि विद्यालयलाई पुनःस्थापनामा सहयोग गर्ने कार्यक्रमहरू पनि उसैले सञ्चालन गर्नेछ।
सन् २०२२ मा टेक्सास राज्यको उभाल्डेस्थित एक प्राथमिक विद्यालयमा भएको सामूहिक गोलीकाण्डपछि कंग्रेसले स्थापना गरेका मानसिक स्वास्थ्य अनुदान कार्यक्रमहरू पनि यसैअन्तर्गत पर्छन्। गत वर्ष प्रशासनले ती अनुदान रोक्ने प्रयास गरेको भए तापनि मुद्दा परेपछि अन्ततः करोडौँ डलर अनुदान वितरण गरिएको थियो।
केनेडीले बालबालिकाको सुरक्षा सबैभन्दा महत्त्वपूर्ण विषय भएको उल्लेख गर्दै संकट व्यवस्थापनमा विभागको अनुभव विद्यालयसम्म पुर्याइने बताएका छन्। शिक्षा मन्त्रालयले भने राज्यहरू तथा अनुदान प्राप्त संस्थाहरूको कोष प्रवाहमा अवरोध नआउने स्पष्ट पारेको छ।
विदेशी लगानीसम्बन्धी अनुगमनमा विदेश मन्त्रालयले शिक्षा मन्त्रालयको नयाँ प्रतिवेदन प्रणाली सञ्चालनमा सहयोग गर्नेछ। हाल अमेरिकी कलेज तथा विश्वविद्यालयहरूले गत वर्ष ५.२ अर्ब डलरभन्दा बढी विदेशी उपहार तथा सम्झौता प्राप्त गरेको विवरण सार्वजनिक भएको छ। शिक्षा मन्त्री म्याकमहोनले उच्च शिक्षामा विदेशी आर्थिक प्रभावबारेको अनुसन्धानलाई प्राथमिकता दिएकी छन्।