प्रकाशित मिति : असार २६, २०८१ बुधबार
अमेरिकामा म्याद सकिएका निश्चित प्रकारका वर्क परमिटको अवधि स्वतः ५४० दिन थप्ने नियम स्थायी बनाउने युएससीआईएसले योजना बनाएको छ । अप्रिल ८ मा फेडरल रजिष्ट्ररमा प्रकाशित अस्थायी अन्तिम नियमले म्याद सकिएका कैयन वर्क परमिटको अवधि १८० दिनबाट बढाएर ५४० दिन बनाएको थियो । यो नियमको म्याद सेप्टेम्बर २०, २०२७ मा सकिदैछ ।
यो नियमका लागि जुन ७ सम्म कमेन्ट अवधि तोकिएको थियो । अब यो नियमलाई स्थायी नियम बनाउनेगरी आगामी डिसेम्बरमा अन्तिम नियम प्रकाशित गर्ने युएससीआईएसको तयारी रहेको छ । यस्तै नियम सन् २०२२ को मे ४ मा पनि ल्याइएको थियो । उक्त नियम पनि अस्थायी अन्तिम नियम भएकाले अक्टोबर २०२५ सम्मकोमात्र म्याद थियो ।
योग्य गैर नागरिकहरूका लागि वर्क परमिटमा पहुँचलाई सुव्यवस्थित र आधुनिकीकरण यो नियम ल्याएको युएससीआईएसले जनाएको छ । वर्क परमिटको प्रशोधन समयलाई उल्लेखनीय रूपमा घटाएको अवस्थामा ल्याइएको यो नियमले आवेदकहरुलाई थप राहत प्रदान गरेको छ । यो नियमले पहिले नै वर्क परमिट प्राप्त गैर नागरिकहरूलाई पेन्डिङ वर्क परमिट नवीकरणको प्रतिक्षा गरिरहँदा वर्क परमिट ल्याप्स हुनबाट जोगाउनुका साथै गरिरहेको काममा निरन्तरता सुनिश्चित गर्दछ ।
सन् २०२३ को अक्टोबर २७ वा त्यसपछि समयमै र उचित रूपमा वर्क परमिटको नवीकरण आवेदन दिएका र आवेदन अप्रिल ८ सम्म पनि विचाराधीन रहेकाहरुको म्याद सकिएको पुरानो वर्क परमिटको अवधि स्वत डेढबर्ष थपिन्छ । नयाँ नियम प्रकाशित भइसकेपछि समयमै र उचित रूपमा वर्क परमिटको नवीकरण आवेदन दिनेहरुका हकमा पनि यो नियम लागु भएको छ ।
यो नियम नल्याएको भए झण्डै ८ लाख एसाइलम स्वीकृत भएका वा पेन्डिङ रहेकाहरु, टीपीएस स्वीकृत भएका वा पेन्डिङ रहेकाहरु र ग्रिनकार्ड आवेदकहरु नविकरण आवेदन गरिएको वर्क परमिट नआउँदा र आफूसँग भएको म्याद सकिएको वर्क परमिटका कारण काम गुमाउने जोखिममा पर्ने सम्भावना थियो । जसमाबाट ६० देखि ८० हजार रोजगारदाताले कामदार गुमाउने सम्भावना थियो ।
सामान्यतया वर्क परमिटको अवधि स्वीकृत परोल अवधिसम्म कायम रहने भएतापनि यो नियमले परोलको अपधि भने थप गर्दैन । जसको अर्थ कोही व्यक्तिले ५४० भन्दा अगाडि नै अमेरिकामा काम गर्ने अधिकार गुमाएको खण्डमा स्वत थपिएको अवधि उसको हकमा पूरै दिन लागु हुँदैन ।
सन् २०२३ को मे १२ देखि सन् २०२४ को मार्च १३ सम्म अमेरिकी सरकारले ६ लाख १७ हजारलाई देशनिकाला गरिसकेको छ । उनीहरुमध्ये अधिकांश विना भिसा मेक्सिकोबाट अमेरिका प्रवेश गर्नेहरु हुन् ।
