प्रकाशित मिति : असार ३२, २०८२ बुधबार
अमेरिकाको लुइजियानाका प्रहरी प्रमुखहरूले नक्कली डाँका रिपोर्ट बनाएर आप्रवासीहरूसँग भिसाका लागि रकम असुलेको अभियोग लागेको छ ।
मध्य लुइजियानाको केही नगरहरूमा प्रहरी अधिकारीहरूले हस्ताक्षर गरेका डाँका सम्बन्धी प्रहरी प्रतिवेदनहरूमा आप्रवासीहरूलाई लक्षित गरेको देखिन्थ्यो।
ती सबै आप्रवासीहरू अमेरिका भित्रिन संघर्षरत व्यक्तिहरू थिए । उनीहरुको स्थानीय क्षेत्रसँग कुनै सम्बन्ध थिएन। तर संघीय अनुसन्धानकर्ताहरूका अनुसार ती प्रतिवेदनहरू झुट्टा देखिएका छन ।
ूवास्तवमा, ती सशस्त्र डाँकाहरू कहिल्यै भएका नै थिएनन्, पश्चिम लुइजियानाका कार्यवाहक अमेरिकी अटर्नी एलेक्जेन्डर सी भ्यान हुकले पत्रकारहरूलाई भनेका छन ।
भ्यान हुक र अन्य संघीय अधिकारीहरूले बताएअनुसार यो सबै एउटा योजनाको हिस्सा थियो र संघीय यू भिसा कार्यक्रमलाई दुरुपयोग गर्न खोजेको थियो।
उक्त कार्यक्रम सन् २००० मा सुरु गरिएको हो । जसले केही विशिष्ट हिंसात्मक अपराधका शिकार भएका गैरकानुनी आप्रवासीहरूलाई अस्थायी बसोबास अनुमति र नागरिकताको बाटो खुलाउने व्यवस्था गर्दछ ।
तर यसका लागि आवेदकहरूले प्रहरीको अनुसन्धानमा सहयोग गर्नुपर्छ र आफू पीडित भएको प्रमाण पनि पेश गर्नुपर्छ । प्रहरी प्रमुखहरूले झुट्टा डाँका रिपोर्टहरू बनाएर आप्रवासीहरूलाई ‘पीडित’ देखाउने काम गरेका थिए ।
ती रिपोर्टहरूमा समावेश व्यक्तिहरूले स्थानीय व्यापारी चन्द्रकान्त पटेललाई रकम तिरेका थिए । उनले फेरि ती प्रहरी अधिकारीहरूलाई प्रति आप्रवासी ५ हजार अमेरिकी डलरसम्म तिरेर नक्कली रिपोर्ट तयार गर्न लगाएका थिए।
संघीय ग्रान्ड जुरीले लुइजियानाको तीन साना सहरका वर्तमान तथा पूर्व प्रहरी प्रमुखहरू, एक स्थानीय प्रहरी अधिकृत र व्यापारी चन्द्रकान्त पटेललाई अभियोग लगाएको छ ।
चाड डोएल, ओकडेल, लुइजियानाका प्रहरी प्रमुख , ग्लिन डिक्सन, फरेस्ट हिलका प्रहरी प्रमुख, टेबो ओनिसिया, ग्लेनमोरा नगरका पूर्व प्रहरी प्रमुख र माइकल स्लेनी, ओकडेलका मार्शललाई अभियोग लगाइएको छ ।
चन्द्रकान्त पटेल ओकडेलमा कन्विनिएन्स स्टोर र एक सबवे फ्रेन्चाइजका मालिक हुन् । उनी योजनाका सूत्रधार रहेको अभियोगपत्रमा उल्लेख गरिएको छ । उनीमाथि घूस, डाँक मार्फत ठगी र धन शुद्धिकरणको आरोप लागेको छ।
प्रहरी अधिकारीहरूलाई भिसा ठगी,डाँकमार्फत ठगी,धन शुद्धिकरणको आरोप लगाइएको छ ।
एफबीआई न्यू ओरलिन्सका प्रमुख जोनाथन ट्यापले प्रहरी अधिकारीहरूबाट जनताको सुरक्षा र विश्वासको सम्मानको अपेक्षा गरेको बेला त्यो सम्मानलाई बेचेर आफ्नो उनीहरुले पदको दुरुपयोग गरेको बताएका छन ।
यो घोटालाले केवल अमेरिकी आप्रवासन प्रणालीमाथिको अविश्वास मात्र होइन, कानुन कार्यान्वयन गर्ने निकायभित्रकै भ्रष्टाचारलाई पनि उजागर गरेको छ । अब अदालतमा यसको कानुनी प्रक्रिया अघि बढ्नेछ ।