प्रकाशित मिति : कार्तिक २९, २०८१ बिहीबार
अमेरिकामा दुर्घटनामा गम्भीर घाइते नेपाली महिला रबिना पौडेललाई सहयोग गर्न गोफन्डमी अकाउन्ट सुरु गरिएको छ। पौडेल कनेक्टिकट राज्यको वेस्ट हेभनमा भएको दुर्घटनामा गम्भीर घाइते भई अस्पताल भर्ना भएकी छन्।
गण्डकी प्रदेशको बागलुङ नगरपालिका वडा नं १३ की पौडेल मास्टर्स डिग्रीको पढाइका लागि हालै अमेरिका आएकी थिइन्। उनी न्यू हेभन विश्वविद्यालयमा जनस्वास्थ्य पब्लिक हेल्थ अध्ययन गर्दै थिइन् । राम्रो भविष्य निर्माण गर्ने आशामा उनी आफ्नो शैक्षिक यात्रा अघि बढाइरहेकी थिइन्।
तर, २०२४ सेप्टेम्बर २९ को साँझ उनको जीवन अचानक बदलियो। विश्वविद्यालय नजिकै क्रसवाक पार गर्ने क्रममा पहिलो लेनका चालकले उनलाई बाटो पार गर्न संकेत दिए पनि दोस्रो लेनमा आएको गाडीले उनलाई ठक्कर दियो।
ठक्करको असर गम्भीर थियो, जसले उनको मेरुदण्ड र पेल्भिसमा गम्भीर चोट पुर्यायो। उनलाई तुरुन्तै येल अस्पताल लगियो, जहाँ हालसम्म उनका तीनवटा ठूला शल्यक्रिया गरिएको छ। शारीरिक र मानसिक दुवै हिसाबले उनी अत्यन्तै कमजोर अवस्थामा रहेकी छन्।
यो दुःखद दुर्घटनाले पौडेलको जीवनमा ठूला चुनौतीहरू ल्याएको छ। उनी लामो र कठिन उपचारको प्रक्रियामा छिन्, जसमा धेरै चिकित्सा खर्च, यातायात, आवास समस्या, र अध्ययनलाई निरन्तरता दिने अनिश्चिततासमेत रहेको छ।
यस कठिन समयमा उनलाई सहयोग पुर्याउन अमेरिकाको ब्रान्फोर्ड, कनेक्टिकटमा रहेको सोसाइटी अफ नेपालिज इन अमेरिकाले ५०,००० डलर संकलनको लक्ष्यसहित गोफन्डमी अभियान सुरु गरेको छ।
सोसाइटी अफ नेपालिज इन अमेरिकाले समुदायसँग सहयोगको अपिल गर्दै पौडेलको उपचारमा सहयोग पुर्याउन सबैलाई आग्रह गरेको छ। पौडेलको उपचारमा आवश्यक सहयोग पुर्याउन सामुदायिक सहकार्यको महत्त्वमा जोड दिइएको छ।
रबिना पौडेललाई सहयोग गर्न चाहनेहरूले सोसाइटी अफ नेपालिज इन अमेरिकाद्वारा सुरु गरिएको गोफन्डमी मार्फत सहयोग गर्न सक्छन्। सानो होस् या ठूलो, प्रत्येक सहयोगले उनीलाई यस कठिन घडीमा अघि बढ्न मद्दत पुर्याउने सोसाइटीले जनाएको छ ।