प्रकाशित मिति : २७ चैत्र २०८२, शुक्रबार
अमेरिकाको क्यालिफोर्नियाका गभर्नर पदका डेमोक्र्याटिक उम्मेदवार तथा सांसद एरिक स्वालवेलविरुद्ध यौन दुर्व्यवहारका गम्भीर आरोपहरू सार्वजनिक भएका छन्। उनले ती आरोपहरूलाई पूर्ण रूपमा अस्वीकार गरेका छन्।
उनकै एक पूर्वकर्मचारीले सन् २०२४ मा आफू अत्यधिक मदिरा सेवनको अवस्थामा रहेको बेला स्वालवेलले बलात्कार गरेको आरोप लगाएकी छन्। ती महिलाले यसअघि सन् २०१९ मा पनि आफू नशामा हुँदा स्वालवेलसँग सहमतिबिना यौन सम्पर्क भएको दाबी गरेकी छन्। उनका अनुसार, त्यसबेला उनी होटलको कोठामा नग्न अवस्थामा ब्युँझिएकी थिइन् र उनलाई के भएको थियो भन्ने केही सम्झना थिएन।
यसैबीच, अन्य तीन महिलाले पनि स्वालवेलमाथि विभिन्न प्रकारका यौन दुर्व्यवहारका आरोप लगाएका छन्। तीमध्ये केहीले स्वालवेलले यौनजन्य सन्देश तथा नग्न तस्बिरहरू पठाउने गरेको बताएका छन्।
एक महिलाले अनलाइनमार्फत स्वालवेलसँग राजनीतिक विषयमा सम्पर्क गरेपछि उनीसँग भेट भएको र त्यस क्रममा अत्यधिक नशामा परेर आफू उनको होटल कोठामा पुगेको बताइन्। उनलाई त्यहाँ के भयो भन्ने स्पष्ट सम्झना छैन। उनले बारमा स्वालवेलले आफूलाई बिनासहमति चुम्बन गरेको र खुट्टा छोएको पनि आरोप लगाएकी छन्।
सामाजिक सञ्जालकी क्रिएटर एली समार्कोले पनि स्वालवेलबाट नग्न सन्देशहरू प्राप्त भएको दाबी गरेकी छन्। उनले सुरुमा ट्विटरमार्फत राजनीतिक कुराकानीका लागि उनीसँग सम्पर्क गरेकी थिइन्।
स्वालवेलले यी सबै आरोपहरू असत्य भएको बताएका छन्। उनले भने, “यी आरोपहरू झूटा हुन् र चुनावको मुखमा ल्याइएका हुन्। मैले करिब २० वर्ष सार्वजनिक सेवामा महिलाहरूको सुरक्षा गर्दै आएको छु र आवश्यक परे म कानुनी कारबाही गर्नेछु।”
उनका वकिलले केही महिलालाई पत्र पठाउँदै आरोपहरू फिर्ता लिन चेतावनी दिएका छन्। पत्रमा ती महिलाहरूले वर्षौंसम्म स्वालवेलसँग स्वेच्छाले सम्बन्ध कायम राखेको दाबी गर्दै लगाइएका आरोपहरू कमजोर भएको उल्लेख गरिएको छ।
पूर्वकर्मचारीले घटनापछि आफ्ना साथीहरूलाई पठाएका सन्देशहरू, परिवारका सदस्यहरूसँग गरेको कुराकानी तथा स्वास्थ्य परीक्षणसम्बन्धी कागजातहरू पनि प्रमाणका रूपमा प्रस्तुत गरेकी छन्। आरोप लगाउने महिलाहरूका अनुसार स्वालवेलले आफ्नो प्रभाव र शक्ति प्रयोग गरेर उनीहरूलाई प्रभावित पारेका थिए। उनीहरूले स्वालवेलले सुरुमा यौनजन्य सन्देशहरू पठाउने र कतिपय अवस्थामा शारीरिक दुर्व्यवहारसम्म गर्ने गरेको बताएका छन्। उनीहरूका अनुसार यस्ता घटनाहरू प्रायः मदिरा सेवनसँग सम्बन्धित हुन्थे।
यद्यपि, स्वालवेलसँग काम गरेका अन्य केही महिलाहरूले भने उनीसँग कुनै पनि अनुचित व्यवहार नभएको र उनी सहयोगी एवं हेरचाह गर्ने स्वभावका रहेको बताएका छन्।
यी आरोपहरू स्वालवेलको गभर्नर चुनावी दौड तीव्र भइरहेको समयमा सार्वजनिक भएका हुन्। यसले राजनीतिक रूपमा ठूलो प्रभाव पार्न सक्ने अनुमान गरिएको छ।