प्रकाशित मिति : जेष्ठ २०, २०८१ आईतबार
अमेरिकामा टी-२० क्रिकेटको विश्वकपको बारेमा प्रचार क्रिकेट प्रमुख खेल भएका अन्य देशहरूमा जति छैन । अमेरिकाका मिडियाहरुले पनि टी २० विश्वकपलाई खासै प्राथमिकता दिएका छैनन् । अमेरिकन मिडियाहरुमा यतिबेला आगामी राष्ट्रपति चुनावको विषय नै प्रमुख रहेका छन् ।
विश्वकपका बारेमा आयोजना गरिएका पत्रकार सम्मेलनहरुमा पनि निकै कममात्र मिडियाका पत्रकारहरु सहभागी हुने गरेका छन् । अमेरिका र क्यानडा बीचको उद्घाटन खेल अघि प्रिम्याच प्रेस सम्मेलनमा जम्मा ५ जना पत्रकारहरुको उपस्थिति थियो जबकी त्यतिबेला नेपालबाट आएका ८ जना मान्यता प्राप्त पत्रकारहरू ग्रान्ड प्रेरीको ठीक बाहिर नेपाली टोलिको तालिम भइरहेको स्थानमा थिए।
For those curious about the level of media hype/interest ahead of the opening match of the 2024 Men’s T20 World Cup in Dallas between USA & Canada, today’s final pre-match press conference was attended by 5 people. Me, @smit2592, @DGBeswick1, @cameronponsonby, & @AndyBullatGNM.
— Peter Della Penna (@PeterDellaPenna) May 31, 2024
क्रिकेटले अमेरिकामा धेरै उत्साह उत्पन्न गर्न नसक्नुका विभिन्न कारणहरु रहेका छन् । अमेरिकामा परम्परागत अमेरिकी खेलहरू जस्तै फुटबल, बेसबल, र बास्केटबलले खेल संस्कृतिमा प्रभुत्व जमाएको छ, जसले क्रिकेटको लागि खुट्टा राख्नु चुनौतीपूर्ण बनाउँछ।
एक सर्वेक्षणले पत्ता लगाए अदनुशार १० प्रतिशत अमेरिकीहरूलाई मात्र मेजर लिग क्रिकेटबारे थाहा थियो । अझ थोरैलाई क्रिकेटको विश्वकपबारे थाहा छ । यद्यपि विशेष गरी युवाहरुमा क्रिकेटबारेको चासो भने बढ्दो नै पाइएको छ ।
क्रिकेट कुनै समय अमेरिकामा लोकप्रिय थियो, तर यसको लोकप्रियता गृहयुद्ध पछि घट्यो किनभने बेसबलले राष्ट्रिय खेलको रूप लियो। अर्कोतर्फ अमेरिकाले अझै पनि आफ्नो क्रिकेट पूर्वाधार विकास गरिरहेको छ, जुन खेललाई व्यावसायिक स्तरमा समर्थन र प्रवर्द्धन गर्न आवश्यक छ।
२०२१ मा,अन्तर्राष्ट्रिय खेलको सबैभन्दा छोटो ढाँचा क्रिकेटको ट्वान्टी २० विश्वकपको यस संस्करणको लागि संयुक्त आयोजकको रूपमा अमेरिकालाई जिम्मा दिइएको थियो। ५५ खेलहरू मध्ये १६ वटा अमेरिकामा आयोजना हुनेछन्, जुन फ्लोरिडा, न्यूयोर्क र टेक्सासमा हुनेछन् ।
टेक्सासको ग्रान्ड प्रेरीमा शनिबार भएको खेलमा क्यानडालाई ७ विकेटले पराजित गर्दै अमेरिकाले टी–२० विश्वकपको उद्घाटन गरेको छ । जुन २९ को फाइनल लगायतका खेलहरू क्रिकेट राष्ट्र वेस्ट इन्डिजको मैदानमा खेलाइनेछन्। टी–२० क्रिकेटको आगमनले खेलको लागि अमेरिकामा नयाँ व्यावसायिक क्षितिज खोलेको छ ।
अमेरिकामा विश्वको सबैभन्दा ठूलो आप्रवासी जनसंख्या भएकाले र भारतीहरुको संख्या ठूलो भएकाले क्रिकेटका फ्यानहरु अमेरिकामा पनि छन् । तर सर्वेक्षण अनुशार अहिलेको टी–२० विश्वकपबारे ६ प्रतिशत अमेरिकीहरुलाईमात्र थाहा छ । पाँच मध्ये एकले प्रतियोगितामा रुचि देखाएको सर्वेक्षणले देखाएको छ । १८ देखि ३४ बर्षकाहरुले बढी रुची देखाएका छन् ।
क्रिकेटमा चासो राख्ने ६२ प्रतिशतलेमात्र अमेरिकाको क्रिकेट टोलीलाई समर्थन गर्छन् । किनभने क्रिकेटमा चासो राख्नेहरुको ठूलो संख्या क्रिकेट मुख्य खेल भएका देशबाट अमेरिका बसाई सराई गरेका आप्रवासीहरुको रहेको छ ।
