प्रकाशित मिति : श्रावण ६, २०८२ मंगलबार
अमेरिकाबाट डिपोर्ट भई एल साल्भाडोरको जेलमा राखिएका भेनेजुएलाली आप्रवासीमाथि ‘अत्याचार’ भएको भेनेजुएलाले आरोप लगाएको छ ।
एल साल्भाडोरको बदनाम जेलमा राखिएका भेनेजुएलाली आप्रवासीहरूमाथि गम्भीर मानव अधिकार उल्लङ्घन भएको आरोपमा भेनेजुएलाले औपचारिक छानबिन सुरु गर्ने घोषणा गरेको हो ।
मार्च महिनादेखि एल साल्भाडोरमा थुनिएका २५० भन्दा बढी भेनेजुएलालीहरूलाई राजधानी काराकास नजिकै पुनः देश फिर्ता गरिएको थियो ।
उनीहरूलाई अमेरिकाबाट निर्वासित गरिएपछि एल साल्भाडोरले पक्राउ गरी जेलमा राखिएको थियो ।
भेनेजुएलाका महान्यायाधिवक्ता टारेक विलियम साबले जेलभित्र यौन दुर्व्यवहार, कुटपिट, र कुहिएको खाना दिने जस्ता संगठित यातनाहरु दिइएको दाबी गरेका छन ।
साबले थुनुवा व्यक्तिहरूको शरीरमा निलो दाग, टुटेका दाँतजस्ता चोटहरू देखिने तस्बिर र बयानहरू सार्वजनिक गरेका छन् ।
महान्यायाधिवक्ता साबले एल साल्भाडोरका राष्ट्रपति नायिब बुकेले, न्यायमन्त्री गुस्ताभो भिल्लातोरो, र जेल प्रमुख ओसिरिस लुना मेजालाई अनुसन्धानको दायरामा ल्याउने बताएका छन्।
साथै उनले अन्तर्राष्ट्रिय फौजदारी अदालत, संयुक्त राष्ट्रसंघको मानव अधिकार परिषद र अमेरिकी क्षेत्रका सम्बन्धित संस्थाहरूलाई पनि छानबिन गर्न आग्रह गरेका छन्।
भेनेजुएला आफैं पनि हाल हेगस्थित अन्तर्राष्ट्रिय फौजदारी अदालतद्वारा थुनामा यातना र कानुनी प्रतिनिधित्व नदिएको आरोपमा छानबिनको सामना गरिरहेको छ ।
थुनामा रहेका भेनेजुएलालीहरूलाई अमेरिकाको सन् १७९८ को एलियन इमिनिज एक्ट अन्तर्गत निर्वासित गरिएको थियो ।
अमेरिकी राष्ट्रपतिलाई ‘शत्रु राष्ट्र’ का नागरिकहरूलाई सामान्य कानुनी प्रक्रियाविना पनि थुनिन वा देशनिकाला गर्न यो कानूनले अधिकार दिन्छ।
अमेरिकाले उनीहरूलाई ग्याङ सदस्य रहेको आरोप लगाएको थियो । तर पीडितका आफन्त र वकिलहरूले भने यो आरोपलाई अस्वीकार गरेका छन् ।
थुनामा राखिएका उनीहरूलाई जुलाईको मध्यतिर एल साल्भाडोरले मुक्त गरेको थियो । बदलामा भेनेजुएलामा थुनामा रहेका अमेरिकी नागरिकहरूलाई छोडिएको थियो । अमेरिकाले भेनेजुएलामाथि गम्भीर आर्थिक प्रतिबन्ध लगाइरहेको छ ।