प्रकाशित मिति : जेष्ठ ३१, २०८२ शनिबार
अमेरिकाको मिनेसोटामा दुई राज्य सांसदहरूलाई लक्षित गरी गोली प्रहार भएको छ । गोली प्रहारबाट एकजनाको मृत्यु भएको छ । यस आक्रमणमा मिनेसोटा राज्यकी पूर्व सभामुख मेलिसा होर्टम्यान र उनका पति मार्कको मृत्यु भएको छ ।
डेमोक्र्याट पार्टीकी ५५ वर्षीया होर्टम्यानको शव ब्रुकलिन पार्कस्थित घरमा भेटिएको हो । उनीसँगै उनका पतिको पनि हत्या गरिएको छ ।
यस आक्रमणसँग सम्बन्धित अर्को घटनामा डेमोक्र्याट राज्य सिनेटर ६० वर्षीय जोन होफम्यान र उनकी श्रीमतीलाई उनीहरूकै घरमा गोली प्रहार गरिएको थियो ।
उनीहरू मिनियापोलिस नजिकैको अर्को शहरमा बसोबास गर्दै आएका थिए। होफम्यानको शल्यक्रिया सफल भएको र अहिले अवस्था स्थिर रहेको बताइएको छ ।
दुई राज्य सांसदहरूलाई लक्षित गरी गरिएको आक्रमणलाई गभर्नर टिम वाल्जले ‘राजनीतिक उद्देश्यप्रेरित हिंसात्मक हमला’ को संज्ञा दिएका छन्।
प्रहरीका अनुसार आक्रमणकारी ५७ वर्षीय भ्यान्स लुथर बोएल्टर नामका व्यक्ति हुन् । उनले आफैलाई प्रहरी अधिकारीको रूपमा चिनाएर पीडितहरूको घरभित्र छिरेका थिए ।
उनी प्रहरी पोशाकमा थिए र प्रहरी सवारीजस्तै देखिने गाडी प्रयोग गरिरहेका थिए । गाडीमा इमर्जेन्सी लाइटसमेत जडित थियो।
पुलिस र आक्रमणकारीबीच होर्टम्यानको घरमा गोली हानाहान भएको पुष्टि गरिएको छ । तर आरोपी घटनास्थलबाट भाग्न सफल भएको बताइएको छ ।
ब्रुकलिन पार्कका प्रहरी प्रमुख मार्क ब्रुलेका अनुसार एफबीआई, स्वाट र सयौं सुरक्षाकर्मीहरूको सहयोगमा आक्रमणकारीको खोजी कार्य तीव्र रुपमा भइरहेको छ । पुलिसले बोएल्टरको गाडी फेला पारेको छ ।
यदि कुनै प्रहरी अधिकारी ढोका ढकढक्याउँछन् भने दुई जना सँगै हुनु आवश्यक छ भन्ने चेतावनी नागरिकलाई दिइएको छ ।
राष्ट्रपति डोनाल्ड ट्रम्पले विज्ञप्ति जारी गर्दै यसप्रकारको भयावह हिंसा अमेरिका मा सहन सकिँदैन भनेका छन । उनले संलग्न सबैलाई कडा कानुनी सजाय दिइने बताएका छन ।
राज्यका सार्वजनिक सुरक्षा आयुक्त बब जैकबसनले यो मिनेसोटाका लागि एक अँध्यारो दिन हो भनेका छन । तर हामी डर वा हिंसाले हाम्रो भविष्य तय गर्न दिने छैनौं भनेर दावी गरेका छन ।
गभर्नर वाल्जले राज्य आपतकालीन सञ्चालन केन्द्र सक्रिय गरेका छन् । उनले होर्टम्यानलाई ‘मिनेसोटाकी महान नेतृ’र ‘व्यक्तिगत रूपमा सबैभन्दा प्रिय मित्र’ को रूपमा सम्झेका छन्।
होर्टम्यान सन् २००४ मा मिनेसोटा राज्यको सभासद बनेकी थिइन् ।
२०१९ देखि २०२५ सम्म सभामुखको भूमिकामा रहिन् । उनले महिला अधिकार संरक्षण, स्वच्छ उर्जामा लगानी, र बालबालिकाका लागि निःशुल्क स्कुल खाना कार्यक्रमका लागि काम गरेकी थिइन् । उनी दुई सन्तानकी आमा थिइन्। उनका पति मार्क पनि यस आक्रमणमा मारिएका छन्।