प्रकाशित मिति : असार ४, २०८२ बुधबार
अमेरिकाको पूर्वी क्षेत्रमा गर्मीको लहर आउन सक्ने पूर्वानुमान गरिएको छ ।
पूर्वी राज्यमा यस साता अन्त्यदेखि अर्को साता सुरुसम्म गर्मीको लहर फैलिने पूर्वानुमान गरिएको हो । यससँगै केही स्थानहरूमा शक्तिशाली आँधीबेहरी, ठूलो असिना र क्षति पुर्याउने हावा लाग्ने खतरा पनि कायम छ।
मौसमविद्का अनुसार पश्चिमबाट न्यूनचापीय प्रणाली बिस्तारै सर्ने क्रममा ओहायो उपत्यका, मिडवेस्ट र मिसिसिपी उपत्यकाका क्षेत्रहरूमा चट्याङ, असिना र आँधीबेहरीको जोखिम देखिएको छ।
यो प्रणाली पूर्वतर्फ बढ्दै जाँदा बिहीबारसम्म उत्तरपूर्वी भागहरूमा समेत वर्षा र आँधी आउने सम्भावना छ।
यस प्रणाली पछिपछि अमेरिका भरि गर्मी र सामान्यभन्दा बढी तापक्रम फैलिनेछ । नेशनल वेदर सर्भिस ले यसलाई यस वर्षको पहिलो महत्वपूर्ण गर्मीको लहर भनेको छ।
शुक्रबारका लागि केही क्षेत्रमा तापमान सामान्यभन्दा २५ देखि ३५ डिग्री फारेनहाइट बढी पुग्ने सम्भावना छ । रॉकीज र प्लेन्स क्षेत्रहरूमा शुक्रबार र शनिबार दैनिक तापक्रम रेकर्ड तोड्ने सम्भावना रहेको मौसमविद्हरूले बताएका छन्।
गर्मी अब पूर्वी उत्तरअमेरिकामा ढिलो गरेर तर निकै तिब्र रूपमा आइरहेको मौसमविद्ले बताएका छन । अर्को साता भरि तातो र चिस्यानयुक्त मौसमका कारण ‘ट्रिपल डिजिट’ तापक्रम महसुस हुने सम्भावना धेरै छ।
तापक्रम र चिस्यानलाई एकसाथ मापन गर्दा प्राप्त हुने हिट इन्डेक्सले मानिसले वास्तवमा कस्तो गर्मी महसुस गर्छ भन्ने जनाउँछ।
गर्मी यो सप्ताहन्तको अन्त्यतिर मिडवेस्ट, ओहायो उपत्यका हुँदै आइतबारबाट उत्तरपूर्वी र मिड एटलान्टिक क्षेत्रमा फैलिने अनुमान छ।
नेशनल वेदर सर्भिस का अनुसार उत्तरपूर्वी क्षेत्रहरूमा अर्को साता बीचसम्म ‘उच्च जोखिम’ अर्थात् ६० प्रतिशत भन्दा बढी सम्भावना रहेको छ ।
नेशनल वेदर सर्भिस अनुसार गर्मीको लहर भन्नाले लगातार दुई दिनभन्दा बढी समयसम्म असामान्य गर्मी पर्ने अवस्था हो ।
यसले प्रायः ठूलो भूभागलाई असर गर्छ र धेरै मानिसलाई स्वास्थ्यमा हानि पुग्ने खतरा पैदा गर्छ । विशेष गरी बालबालिका, वृद्धवृद्धा, र अन्य कमजोर समूहहरू यसको निशानामा पर्ने गर्दछन ।
विशेषज्ञहरू भन्छन् कि घामबाट टाढा बस्नु सबैभन्दा सजिलो र सुरक्षित उपाय हो । यदि बाहिर जानैपर्ने भयो भने हल्का, खुकुलो र उज्यालो रङको लुगा लगाउने ,नियमित रूपमा पानी पिउने, अत्यधिक शारीरिक गतिविधि जति सक्दो कम गर्नुपर्ने हुन्छ ।
चिकित्सकहरु अनुसार गर्मीले मांशपेशी खिच्नु , अत्यधिक पसिना , सास फेर्न गाह्रो , टाउको दुख्ने, थकाइ, झमझमाहट, वा वाकवाकी लाग्ने जस्ता लक्षणहरु देखिन थाल्छन ।
यी लक्षणहरू देखिएमा तुरुन्त छायाँ वा चिसो ठाउँमा जाने , पानी पिउनु, र सुधार नभएमा चिकित्सकीय सहायता लिनु आवश्यक रहेको छ ।