प्रकाशित मिति : माघ २९, २०८१ मंगलबार
अमेरिकाको जर्जियामा आयोजित डर्ट बाइक रेसिङ प्रतियोगिताका क्रममा दुर्घटनामा परी १२ वर्षीय बालकको मृत्यु भएको छ। उक्त घटनापछि प्रहरी र अधिकारीहरूले घटनाको कारणबारे अनुसन्धान थालेका छन्।
क्रफोर्ड काउन्टी शेरिफ कार्यालयका अनुसार, सप्ताहन्तमा इचेकोन्नी मोटोक्रस रेसिङ ट्रयाकमा एक जना घाइते भएको जानकारी प्राप्त भएपछि कम्युनिटी एम्बुलेन्स सेवा घटनास्थलमा पुगेको थियो। उक्त घाइते व्यक्ति १२ वर्षीय डाल्टन हिल रहेको पुष्टि गरिएको थियो ।
रेसिङका क्रममा गम्भीर घाइते भएका हिललाई तुरुन्तै एट्रियम नाभियन्ट हेल्थ म्याकन अस्पताल लगिएको थियो। अस्पतालका चिकित्सकहरूले उनलाई मृत घोषित गरेका छन्।
क्रफोर्ड काउन्टी शेरिफ कार्यालयले घटनाको विस्तृत अनुसन्धान सुरू गरेको जनाएको छ। शेरिफ लुइस वाकरले बालकको मृत्युका कारण र परिस्थितिहरू पत्ता लगाउन अनुसन्धान भइरहेको बताएका छन्।
यस घटनापछि इचेकोन्नी मोटोक्रसले एक विज्ञप्ति जारी गर्दै दुख व्यक्त गरेको छ।
‘डाल्टन हिलको निधनले हाम्रो मोटोक्रस परिवार अत्यन्तै शोकमा डुबेको छ। उनको परिवार र साथीहरू प्रति हाम्रो गहिरो समवेदना छ’, विज्ञप्तिमा उल्लेख गरिएको छ, ‘हामी सबैले हिल परिवारलाई यो कठिन समयमा समर्थन गर्नुपर्छ।’
यसैबीच, हिल अध्ययनरत जर्जिया मिलिटरी कलेज प्रेप स्कूलले पनि उनको सम्मानमा सबै झण्डा आधा झुकाएको छ।
‘डाल्टन हिलको असामयिक निधनले हाम्रो स्कूल समुदाय शोकमा छ। उनका परिवार, साथीहरू र शुभचिन्तकहरूलाई हाम्रो गहिरो समवेदना’ स्कूल प्रशासनले सामाजिक सञ्जालमार्फत जानकारी गराएको छ।
अहिले पनि घटनाको अनुसन्धान जारी रहेको अधिकारीहरूले बताएका छन्।
तस्बिर : सांकेतिक