प्रकाशित मिति : पुस ४, २०८२ शनिबार
अमेरिकाको क्यालिफोर्नियामा चाँडै पेट्रोलको अभाव हुन सक्ने सम्भावना देखिएको छ। देशकै सबैभन्दा महँगोमध्ये पर्ने यहाँको पेट्रोलको मूल्य, अभावका कारण अझै बढ्न सक्ने देखिन्छ।
राज्यका पेट्रोलियम पदार्थका रिफाइनरीहरू (तेल प्रशोधन केन्द्र) वर्षौँदेखि बन्द हुँदै आएका छन्। यसै क्रममा अब थप दुई रिफाइनरी बन्द हुने तयारीमा छन्।
लस एन्जलस क्षेत्रमा रहेको रिफाइनरी यसै महिनाको अन्त्यमा बन्द हुँदैछ भने ‘बे एरिया’को अर्को रिफाइनरी अप्रिलमा बन्द हुनेछ। यी दुई रिफाइनरीले क्यालिफोर्नियाको करिब १७ प्रतिशत पेट्रोल आपूर्ति गरिरहेका थिए।
क्यालिफोर्नियाका चालकहरूले पहिलेदेखि नै देशका अन्य भागको तुलनामा करिब ५० प्रतिशत बढी मूल्य तिर्दै आएका छन्। हाल यहाँ प्रति ग्यालन औसत मूल्य करिब ४.३२ डलर छ। ‘लिपो आयल एसोसिएट्स’का अध्यक्ष एन्डी लिपोका अनुसार रिफाइनरीहरू बन्द हुनाले मूल्य थप ५० सेन्टसम्म बढ्न सक्छ।
यदि क्यालिफोर्नियामा बाँकी रहेका छ वटा रिफाइनरीमध्ये कुनै एकमा आकस्मिक रूपमा उत्पादन बन्द भयो भने पेट्रोल अभावको जोखिम अझ बढ्न सक्छ। उदाहरणका लागि, फेब्रुअरीमा आगलागी भएको मार्टिनेजस्थित रिफाइनरी अझै पूर्ण क्षमतामा सञ्चालन हुन सकेको छैन।
हवाईपछि क्यालिफोर्नियामा नै अमेरिकाको सबैभन्दा उच्च औसत पेट्रोल मूल्य छ। हवाईमा भने अधिकांश पेट्रोल जहाजमार्फत आयात गरिन्छ।
‘अमेरिकन पेट्रोलियम इन्स्टिच्युट’का अनुसार क्यालिफोर्नियामा देशकै सबैभन्दा उच्च—प्रति ग्यालन करिब ७१ सेन्ट पेट्रोल कर लाग्छ।
यो राष्ट्रिय औसतको दोब्बरभन्दा बढी हो। यसबाहेक राज्यमा ‘कार्बन कर’ पनि छ, जुन पेट्रोलका खुद्रा विक्रेता र वितरकले तिर्ने भए तापनि अन्ततः त्यसको भार उपभोक्तामाथि नै पर्छ।
अमेरिकाको राष्ट्रिय औसत पेट्रोल मूल्य घटेर प्रति ग्यालन २.७५ डलरमा झर्न सक्छ, तर क्यालिफोर्नियामा भने २०२५ को औसत ४.६४ डलरकै आसपास रहने वा अझै बढ्ने सम्भावना छ।
देशका अन्य भागमा २०२६ मा २०२५ को तुलनामा सस्तो पेट्रोल पाइन सक्ने सम्भावना भए पनि क्यालिफोर्नियामा भने मूल्य घट्ने सम्भावना न्यून छ।
लस एन्जलस रिफाइनरी सञ्चालन गर्ने ‘फिलिप्स ६६’ कम्पनीले क्यालिफोर्नियामा सञ्चालन लागत अत्यधिक भएकाले रिफाइनरी बन्द गर्ने निर्णय गरेको जनाएको छ। यद्यपि, क्यालिफोर्नियाका राज्य अधिकारीहरूले भने पेट्रोल अभाव नहुनेमा आफूहरू विश्वस्त रहेको बताएका छन्।
क्यालिफोर्निया ऊर्जा आयोगका अनुसार रिफाइनिङ क्षमता घट्दै जाँदा राज्यले कच्चा तेलको आयात घटाएर प्रशोधित तेलको आयात बढाउनेछ। विश्वभरका रिफाइनरीहरूले अहिले क्यालिफोर्नियाका लागि आवश्यक ‘स्वच्छ इन्धन’ उत्पादन गरिरहेका छन्।
ऊर्जा आयोगकै तथ्याङ्क अनुसार हाल क्यालिफोर्नियाका सडकमा चल्ने गाडीमध्ये करिब ६ प्रतिशत मात्र पूर्ण विद्युतीय वा प्लग–इन हाइब्रिड छन्। त्यसैले अधिकांश चालकहरूले अझै दशकौँसम्म पेट्रोल नै प्रयोग गर्नुपर्ने देखिन्छ।
तर, क्यालिफोर्नियामा नयाँ विद्युतीय सवारीको बिक्री दर भने अमेरिकामै सबैभन्दा उच्च छ। सन् २०३५ सम्ममा नयाँ पेट्रोल चालित गाडीको बिक्रीमा पूर्ण प्रतिबन्ध लगाउने राज्यको योजनाका कारण पनि धेरै रिफाइनरी सञ्चालकहरू वर्षौँदेखि राज्य छोड्दै आएका छन्।
के तपाईं हाम्रो सामुदायिक पत्रकारितालाई सहयोग गर्न चाहनुहुन्छ?
अहिले चलिरहेको न्युजम्याच कार्यक्रममार्फत सहयोग गर्दा, तपाईंले दिनुभएको उपहारमा न्युजम्याच कार्यक्रमबाट सोही बराबरको रकम थपेर हामीलाई प्राप्त हुनेछ। यो कार्यक्रममा हामीसहित अमेरिकाका ४२२ वटा मिडिया संस्थाहरू सहभागी छन्। हामीलाई सहयोग गर्न चाहेमा यहाँ क्लिक गर्नुहोस्।
उपहार प्रदान गर्न क्लीक गर्नुहोला
न्युजम्याचले तपाईंले प्रदान गरेको उपहारको १२ गुणासम्म म्याच गरेर दिने विकल्प समेत दिएको छ। उदाहरणका लागि यदि तपाईंले ८० डलर डोनेसन गर्नुभएमा, आईएनएनले हामीलाई ९६० डलर (८० डलरको १२ गुणा) थपेर जम्मा १०४० डलर प्रदान गर्नेछ। तर त्यसका लागि, तपाईंले मासिक डोनेसनको विकल्प छनौट गर्नुपर्छ। कृपया ध्यान दिनुहोस्: मासिक डोनेसनको विकल्प रोजेपछि, तपाईंको खाताबाट हरेक महिना सोही बराबरको रकम काटिनेछ। तपाईंले भविष्यमा कुनै पनि बेला मासिक डोनेसन रद्द गर्न सक्नुहुनेछ।
मासिक डोनेसन गर्न यहाँ क्लिक गर्नुहोस्