प्रकाशित मिति : मंसिर २३, २०८२ मंगलबार
अमेरिकाको केन्टकी राज्यस्थित एक विश्वविद्यालयमा भएको गोलीकाण्डमा एकजना विद्यार्थीको मृत्यु भएको छ र अर्का एकजना गम्भीर घाइते भएका छन् ।
अधिकारीहरूका अनुसार उक्त घटना केन्टकी स्टेट युनिभर्सिटी (केएसयु) मा भएको हो ।
घटनामा संलग्न भएको आशङ्कामा विश्वविद्यालयका विद्यार्थी नरहेका एक व्यक्तिलाई पक्राउ गरिएको फ्रान्कफोर्ट प्रहरीले जानकारी दिएको छ ।
विश्वविद्यालयले उक्त घटना क्याम्पसको दक्षिणतर्फ रहेको विद्यार्थी आवासगृहमा भएको जनाएको छ ।
प्रहरीका अनुसार यो गोलीकाण्ड लक्षित हमला जस्तो देखिन्छ । यद्यपि, यो ठूलो सङ्ख्यामा गरिएको सामूहिक गोलीकाण्ड भने नभएको अनुमान गरिएको छ ।
केन्टकीका गभर्नर एन्डी बेशियरले सबैभन्दा पहिले घटनाको जानकारी दिँदै “हिंसाको राज्य वा देशमा कुनै स्थान छैन” भनी बताएका छन् ।
फ्रान्कफोर्ट प्रहरी विभाग, क्याम्पस प्रहरी र फ्रान्कलिन काउन्टी शेरिफ अफिसका अधिकारीहरू तत्काल घटनास्थलमा पुगेका थिए ।
हाल स्थानीय, राज्य र सङ्घीय निकायहरूले घटनाको संयुक्त अनुसन्धान गरिरहेको बताइएको छ । प्रहरीले मृतक र घाइतेको पहिचान खुलाएको छैन ।
विश्वविद्यालयले यस हप्ताका बाँकी सबै कक्षा, अन्तिम परीक्षा र क्याम्पस गतिविधिहरू रद्द गरेको छ । साथै, विद्यार्थीलाई घर फर्किने विकल्प पनि दिएको छ ।
करिब १,००० एकड क्षेत्रफलमा फैलिएको उक्त क्याम्पसमा करिब २,२०० विद्यार्थी तथा ४५० कर्मचारी र प्राध्यापकहरू कार्यरत छन् ।
अमेरिका विश्वका विकसित राष्ट्रहरूमध्ये एक भए पनि, गोलीकाण्ड देशको सबैभन्दा गम्भीर र दीर्घकालीन समस्याहरूमध्ये एक मानिन्छ ।
वर्षैभरि विद्यालयदेखि लिएर सुपरमार्केट, धार्मिक स्थल, कन्सर्ट, कार्यालय तथा सार्वजनिक स्थानहरूमा समेत गोलीकाण्डका घटनाहरू हुने गरेका छन् ।
विशेषगरी, अमेरिकामा हथियार बोक्ने स्वतन्त्रताका कारण साधारण नागरिकले पनि सजिलै बन्दुक किन्न पाउने व्यवस्था छ । यही कारणले धेरै विशेषज्ञहरूले हतियारमा सहज पहुँचलाई नै गोलीकाण्डको मुख्य कारणका रूपमा देखाउँछन् ।
सङ्घीय र राज्य सरकारहरूले विभिन्न स्तरमा सुरक्षा कडा पार्ने, पृष्ठभूमि जाँच कडा गर्ने, मानसिक स्वास्थ्य सेवामा सुधार गर्ने जस्ता प्रयास गरे पनि गोलीकाण्ड पूरै रोकिएको छैन ।
प्रत्येक घटनापछि जनस्तरमा आक्रोश बढ्छ र बन्दुक नियन्त्रणका विषयमा ठूलो बहस चल्ने गर्दछ ।
गोलीकाण्डका घटनाहरूले विद्यार्थी, शिक्षक, परिवार तथा समुदायहरूमा गहिरो मानसिक प्रभाव पारेको हुन्छ । धेरै अभिभावकहरू आफ्नो छोराछोरीलाई विद्यालय पठाउँदा पनि चिन्तित हुने गरेका छन् ।
के तपाईं हाम्रो सामुदायिक पत्रकारितालाई सहयोग गर्न चाहनुहुन्छ?
अहिले चलिरहेको न्युजम्याच कार्यक्रममार्फत सहयोग गर्दा, तपाईंले दिनुभएको उपहारमा न्युजम्याच कार्यक्रमबाट सोही बराबरको रकम थपेर हामीलाई प्राप्त हुनेछ। यो कार्यक्रममा हामीसहित अमेरिकाका ४२२ वटा मिडिया संस्थाहरू सहभागी छन्। हामीलाई सहयोग गर्न चाहेमा यहाँ क्लिक गर्नुहोस्।
उपहार प्रदान गर्न क्लीक गर्नुहोला
न्युजम्याचले तपाईंले प्रदान गरेको उपहारको १२ गुणासम्म म्याच गरेर दिने विकल्प समेत दिएको छ। उदाहरणका लागि यदि तपाईंले ८० डलर डोनेसन गर्नुभएमा, आईएनएनले हामीलाई ९६० डलर (८० डलरको १२ गुणा) थपेर जम्मा १०४० डलर प्रदान गर्नेछ। तर त्यसका लागि, तपाईंले मासिक डोनेसनको विकल्प छनौट गर्नुपर्छ। कृपया ध्यान दिनुहोस्: मासिक डोनेसनको विकल्प रोजेपछि, तपाईंको खाताबाट हरेक महिना सोही बराबरको रकम काटिनेछ। तपाईंले भविष्यमा कुनै पनि बेला मासिक डोनेसन रद्द गर्न सक्नुहुनेछ।
मासिक डोनेसन गर्न यहाँ क्लिक गर्नुहोस्