प्रकाशित मिति : पुस ३, २०८१ बुधबार
बाइडेन प्रशासनले अमेरिकाको कामदार भिसा एच वान बीमा जाने विद्यार्थीका लागि वर्क परमिट र भिसाको अवधि थप ६ महिना स्वत बढाइने अन्तिम नियम प्रकाशित गरेको छ । आज बुधबार फेडरल रजिष्ट्ररमा प्रकाशित नियम अनुशार अब कामदार भिसामा जाने विद्यार्थीका लागि वर्क परमिट र भिसाको अवधि अप्रिल १ सम्म बढाइने भएको छ । अहिलेसम्म यो अवधि अक्टोबर १ सम्ममात्र बढाइने प्रावधान रहेकोमा धेरै विद्यार्थीहरुलाई कामदार भिसा एच वान बी स्वीकृत नहुँदासम्मको अवधिमा अध्यागमन स्टाटस जोगाउन समस्या हुने गरेको थियो ।
यो नियम आगामी जनवरी १७ देखि लागु हुनेगरी फेडरल रजिष्ट्ररमा प्रकाशित भएको हो । डिपार्टमेन्ट अफ होमल्यान्ड सेक्युरिटीले कामदार भिसा एच वान बी कार्यक्रममाका आवश्यकताहरूलाई आधुनिकीकरण गर्ने, विद्यार्थीहरूको लागि लचिलोपन सुधार गर्ने र कार्यक्रमको अखण्डता बढाउने उद्देश्यले महत्त्वपूर्ण अद्यावधिकहरू सहितको अन्तिम नियमको घोषणा गरेको हो ।
यो परिवर्तन विशेष गरी वशन्त ऋतुको मध्यमा शैक्षिक कार्यक्रमहरू वा पोष्ट ओपीटी समाप्त हुने विद्यार्थीहरूका लागि महत्त्वपूर्ण रहेको छ । किनकि उनीहरू प्रायः आफ्नो ओपीटीको म्याद समाप्त हुने र कामदार भिसा एच वानबी भिसा सुरु हुने अवधिको बीचमा ग्यापको सामना गर्छन्। क्याप ग्याप विस्तार अक्टोबर १ बाट अप्रिल १ सम्म विस्तार गर्ने नीतिले उनीहरुलाई वर्क परमिट र विद्यार्थी स्टाटस जोगाउन समस्या हुनेछैन ।
एच वान बी कार्यक्रम अन्तर्गत अन्तर्राष्टिय विद्यार्थीहरूलाई काममा राख्न खोज्ने रोजगारदाताहरुले विद्यार्थीको ओपीटीको अन्त्य र तिनीहरूको कामदार भिसा एचवानबीको सुरुवातको बीचमा आउने ग्यापको समयको कारणले गर्दा प्रायः चुनौतीहरू सामना गर्दै आएका छन् । नयाँ नियमले रोजगारी अवरोधहरूको जोखिम घटाएर रोजगारदाताहरूलाई फाइदा पुग्ने अपेक्षा गरिएको । किनभने एफ वान भिसामा रहेका विद्यार्थीहरूले उनीहरूको कामदार भिसा एचवानबी प्रभावकारी नभएसम्म काम जारी राख्न सक्नेछन्। यसले रोजगारदातालाई दक्ष कामदारहरू कायम राख्न र संक्रमणको परिणामबाट हुन सक्ने हानि रोक्न मद्दत गर्नेछ।
सरकारको अनुमान अनुशार यस परिवर्तनले वार्षिक रूपमा लगभग साढे १३ सय विद्यार्थीहरूलाई फाइदा हुनेछ । उनीहरूलाई थप छ महिनासम्म निरन्तर रोजगारी प्रदान गर्दा झण्डै १३ मिलियनदेखि ६५ मिलियन डलरसम्म बार्षिक फाइदा हुने अपेक्षा गरिएको छ भने रोजगारदाताहरूले यी विद्यार्थीहरूबाट बढ्दो उत्पादकत्व प्राप्त गर्नेछन् । साथै सरकारले पनि यी कामदारहरूको बढेको आम्दानीबाट थप कर राजस्व प्राप्त गर्ने अपेक्षा गरिएको छ ।
यो अन्तिम नियम कामदार भिसा एचवान बी स्वीकृति प्रक्रियालाई सुव्यवस्थित बनाउनमा केन्द्रित रहेको छ, जसले अमेरिकी रोजगारदाताहरूको आवश्यकतालाई अझ राम्रोसँग समायोजन गर्न थप लचिलो बनाउँछ। नयाँ नियमले पहिले एच वानबी भिसाका लागि स्वीकृत भएका अधिकांश व्यक्तिहरूका लागि नविकरणका आवेदनहरू छिटो प्रक्रिया गर्न अनुमति दिनेछ।
नियमले एचवानबी भिसाको फराकिलो दायरालाई पनि सम्बोधन गर्दछ। यसले विशेष पेशा पदहरूका लागि मापदण्डमा परिवर्तनहरू समावेश गरेको छ । यो अपडेटले अमेरिकी रोजगारदाताहरूका लागि एचवान बी प्रक्रियालाई अझ प्रभावकारी बनाउन र आवश्यक सीपहरू भएका कामदारहरूलाई भर्ना गर्ने उनीहरूको क्षमतामा सुधार गर्ने लक्ष्य राखिएको छ ।
नियमले एचवान बी भिसाको वार्षिक क्यापबाट छुट प्राप्त गर्ने गैर नाफामुखी र सरकारी अनुसन्धान संस्थाहरूलाई थप लचिलोपन प्रदान गरेको छ । यसले त्यस्ता संस्थाहरूलाई वार्षिक क्यापबाट बाधा नपर्ने गरी उच्च कुशल कामदारहरू सजिलैसँग भर्ना गर्न सक्षम बनाउँछ।
