प्रकाशित मिति : श्रावण ९, २०८२ शुक्रबार
अमेरिकाको कोडियाक, अलास्कामा अवतरण गर्ने क्रममा अलास्का एयरलाइन्सको विमान ठूलो दुर्घटनाबाट जोगिएको छ । अलास्का एयरलाइन्सको फ्लाइट २३१ ले धेरै हरिणलाई ठक्कर दिँदा विमानमा क्षति पुगेको छ ।
अलास्का एयरलाइन्सको बोइङ ७३७ विमानले एंकरिजबाट कोडियाक बेनी बेन्सन राज्य विमानस्थलमा अवतरण गर्दा रनवेमा दुईवटा हरिण दौडिरहेको अवस्थामा ठोक्किएको थियो ।
एयरलाइन्सले जारी गरेको विज्ञप्तिमा ‘दुर्भाग्यवश ती हरिणको मृत्यु भएको’ उल्लेख गरिएको छ ।
विमानको अवतरणपछि गरिएको जाँचमा मुख्य ल्यान्डिङ गियरमा क्षति भएको भेटिएको छ । मर्मत कोडियाकमै गर्नुपर्ने भएको एयरलाइन्सले जनाएको छ।
यो घटनापछि दिनभरका लागि कोडियाकबाट हुने सबै यात्रुवाहक उडानहरू रद्द गरिएको र यात्रुहरूलाई वैकल्पिक उडानहरूमा स्थानान्तरण गरिएको जानकारी दिइएको थियो ।
उपलब्ध एयर ट्राफिक कन्ट्रोलको अडियो अनुसार अवतरणको तयारी गर्दै गर्दा पाइलटले रनवेमा जनावर देखेको जानकारी टावरलाई दिएका थिए ।
घटनापछि रनवे केही समयका लागि बन्द गरी कर्मचारीहरूले अवशेष हटाएका थिए । कम्तीमा दुई हरिण मृत फेला परेका थिए ।
यद्यपि विमानले समस्या बिना टैक्सी गरी पार्क गर्न सफल भयो । कुनै यात्री वा चालक दलका सदस्यहरू घाइते भएका छैनन् ।
संघीय उड्डयन प्रशासनको तथ्याङ्क अनुसार अमेरिकाका विमानस्थलहरूमा हरेक वर्ष हजारौं पटक विमानहरू जनावरसँग ठोक्किन्छन् ।
पछिल्लो वर्ष मात्रै २२ हजार भन्दा बढी यस्ता घटनाहरू रिपोर्ट गरिएको थियो । कोडियाक विमानस्थलमा पनि गत वर्ष पाँच पटक विमान जनावरसँग ठोक्किएका थिए ।
सन् २०२४ मा अमेरिकी विमानहरूले ३ वटा गोही सँग फ्लोरिडामा, १ वटा मंगुससँग हवाईमा, १ वटा बिज्जु सँग नर्थ डकोटामा ठोक्किएका थिए ।