प्रकाशित मिति : जेष्ठ २०, २०८१ आईतबार
अमेरिकाका अर्बपति मिडिया मालिक ९३ वर्षीय रुपर्ट मर्डोकले पाँचौं पटक विवाह गरेका छन् । यो पटक उनले रिटायर्ड आणविक जीववैज्ञानिक ६७ बर्षीया एलेना झुकोवासँग विवाह गरेका हुन् । आइतवार क्यालिफोर्नियास्थित आफ्नो मोरागा भाइनयार्डमा यो विवाह भएको हो ।
मर्डोकको स्वामित्वमा रहेको ब्रिटिश ट्याब्लोइड अखबार द सनद्वारा जारी गरिएका तस्बिरहरूमा दम्पती एकअर्काको छेउमा मुस्कुराएको देखिएको छ । विवाहमा मर्डोकले पहेंलो टाई लगाएका थिए भने झुकोभाले लामो बाहुलाको सेतो पोशाक लगाएकी थिइन् ।
६७ वर्षीया कन्जरभेटिभ रेडियो होस्ट एन लेस्ले स्मिथसँगको इन्गेन्जमेन्ट २ हप्तामा समाप्त भएपछि मर्डोकले चार महिना झुकोभासँग डेटिङ गरेको रिपोर्ट आएको थियो । त्यसपछि यो विवाह भएको हो ।
मर्डोकले झुकोभालाई आफ्नी तेस्रो पूर्व पत्नी वेन्डी देङले आयोजना गरेको ठूलो पारिवारिक जमघटमा भेटेका थिए । तेस्रो पूर्व पत्नीसँग सन् २०१३ मा सम्बन्धविच्छेद भएको थियो भने त्यो अगाडि उनीहरु १४ वर्ष दम्पत्तिका रुपमा रहेका थिए ।
मर्डोकले आफ्नी चौथी श्रीमती ६७ वर्षीया अभिनेत्री र मोडल जेरी हलसँग २०२२ मा सम्बन्ध विच्छेद गरका थिए । गत सेप्टेम्बरमा मिडिया साम्राज्यको नेतृत्व गर्ने सात दशकको क्यारियर पछि मर्डोकले फक्स र न्यूज कर्पोरेशनको अध्यक्ष पदबाट राजीनामा दिएका थिए ।
मर्डोकको न्यूयोर्कमा रहेको कम्पनी न्यूज कर्पले वाल स्ट्रीट जर्नल, फक्स न्यूज र स्काई न्यूज अष्ट्रेलिया लगायतका सयौं स्थानीय, राष्ट्रिय र अन्तर्राष्ट्रिय डिजिटल समाचार आउटलेटहरू प्रकाशित गर्छ । साथै पुस्तक प्रकाशक हार्पर कोलिन्स पनि यसकै माताहतमा रहेको छ । फोर्ब्सका अनुसार मर्डोकको कुल सम्पत्ति करिब १९।५ बिलियन डलर छ।
