प्रकाशित मिति : आश्विन १८, २०८२ आईतबार
अमेरिकाभरका करिब १७० अस्पताल बाढीको गम्भीर जोखिममा रहेको एक अध्ययनले देखाएको छ।
स्वास्थ्य समाचार संस्थानले गरेको विस्तृत अनुसन्धानअनुसार यी अस्पतालहरू चरम मौसम र जलवायु परिवर्तनको उच्च जोखिममा रहेका छन्। ती अस्पतालहरूमा बाढीले अस्पताल डुबाउने वा आपत्कालीन सेवा ठप्प पार्ने सम्भावना उच्च छ।
टेनेसी राज्यको नदी किनारमा रहेको पेनीन्सुला मानसिक स्वास्थ्य अस्पताललाई बाढीको सबैभन्दा ठूलो जोखिममध्ये एक मानिएको छ।
फ्याथम नामक कम्पनीको बाढी सिमुलेशनअनुसार तीव्र आँधी आउँदा अस्पतालवरिपरि ११ फिटसम्म पानी जम्न सक्ने सम्भावना रहेको छ।
यदि यो अवस्था आयो भने सम्पूर्ण सडक र पहुँच मार्गहरू बन्द हुन सक्ने अवस्था रहन्छ। फ्याथमको अध्ययनअनुसार करिब ३० हजार बेड भएका अस्पतालहरू जोखिममा रहेको देखिएको छ।
फ्याथमले अमेरिकाभरका ७,००० भन्दा बढी अस्पतालहरूको बाढी जोखिम अध्ययन गर्दा १७० अस्पतालमा एक फिट वा सोभन्दा बढी पानी पस्ने सम्भावना पाएको हो।
फ्लोरिडा, टेक्सास, लुइजियाना, न्यूयोर्क, भर्जिनिया, र अपालाचिया क्षेत्रका ग्रामीण अस्पतालहरू पनि जोखिममा रहेका छन्।
फ्याथमका प्रमुख वैज्ञानिक ओलिभर विंगका अनुसार, “बाढीको जोखिम सर्वत्र छ। अहिले अनुभव नभएको हुन सक्छ, तर यसको अर्थ त्यो कहिल्यै नहुने भन्ने चाहिँ होइन।”
अमेरिकाको नेसनल ओसियानिक एन्ड एट्मोस्फेरिक एड्मिनिस्ट्रेशनले सन् २०२४ लाई इतिहासकै सबैभन्दा तातो वर्ष घोषणा गरेको छ। वैज्ञानिकहरूका अनुसार पृथ्वीको तापक्रम प्रत्येक १ डिग्री फारेनहाइट बढ्दा अत्यधिक वर्षा ४ प्रतिशतले तीव्र हुने गर्छ।
यसको अर्थ, अघिल्लो पुस्तामा १०० वर्षमा एक पटक हुने बाढी अब १० वर्षमै दोहोरिन सक्छ। अनुसन्धानले राष्ट्रपति डोनाल्ड ट्रम्प प्रशासनमाथि पनि औँला उठाएको छ।
उक्त प्रशासनले बाढी तथा चरम मौसमको जोखिम मूल्याङ्कन गर्ने संस्थाहरू (जसमा राष्ट्रिय मौसम सेवा पनि पर्छन्) को बजेट तथा कर्मचारी कटौती गरेको छ।
ट्रम्प प्रशासनले बाढी प्रतिरोधी संरचना बनाउन सहयोग गर्ने कार्यक्रम पनि बन्द गरेको छ। फेडरल इमर्जेन्सी म्यानेजमेन्ट एजेन्सीका बाढी नक्साहरू दशकौँ पुराना र अधुरा भएकाले धेरै अस्पतालहरूको वास्तविक जोखिम समेटिएको छैन।
फ्याथमका अनुसार एक तिहाइ अस्पतालहरू नक्सामा बाढी जोखिम क्षेत्रभित्र नपरे पनि वास्तवमा उच्च खतरामा छन्। सन् २००५ मा आएको हुरिकेन क्याट्रिनाका बेला न्यू अर्लिन्सको मेमोरियल मेडिकल सेन्टरमा ४५ जनाको मृत्यु भएको थियो।
त्यस्तै, सन् २०२४ मा हुरिकेन हेलेनका कारण टेनेसीको युनिकोई काउन्टी अस्पताल डुब्दा दर्जनौँ बिरामीहरूलाई हेलिकप्टरमार्फत उद्धार गर्नु परेको थियो।
२०१२ मा सुपरस्टोर्म स्यान्डीले ध्वस्त पारेको कोनी आइल्याण्ड अस्पताल (न्यूयोर्क) अहिले पुनर्निर्माण भई रुथ बेडर गिन्सबर्ग अस्पताल बनेको छ।
करिब ९२३ मिलियन डलरको लागतमा पुनर्निर्मित यो अस्पताल अहिले अमेरिकाको सबैभन्दा बाढी प्रतिरोधी स्वास्थ्य संस्थामध्ये एक मानिन्छ। एजेन्सीहरुको सहयोगमा