प्रकाशित मिति : आश्विन २२, २०८१ मंगलबार
अबदेखि अमेरिकामा निश्चित प्रकारका श्रेणीमा पर्ने वर्क परमिट आवेदनहरु अनलाइनमा पीडीएफ फाइल गर्न मिल्ने भएको छ । योग्य आवेदकहरुले पीडीएफमा भरेको वर्क परमिट आवेदन अन्य कागजातका साथ अनलाइनमा अपलोड गर्नसक्ने भएका छन् । युएससीआईएसको अनलाइन एकाउन्टमार्फत नै पीडीएफ आवेदन फाइल गर्न सकिनेछ ।
योग्य आवेदकहरुले अनलाइनबाट पीडीएफ आवेदन फाइल गरेर नै शुल्क मिनाहाको अनुरोध गर्न सक्नेछन् । शुल्क मिनाहाको अनुरोध गर्न फर्म आई ९१२ भर्नुपर्छ । युएससीआईएसले शुल्कमिनाहाको अनुरोध अनलाइनमार्फत स्वीकार गर्न सुरु गरेको पहिलोपटक हो ।
अहिलेका लागि टीपीएस, एसाइलम, निश्चित प्रकारका परिवार र रोजगारमा आधारित ग्रिनकार्ड आवेदन विचाराधिन रहेकाहरु, परोली, टीपीएस आवेदन विचाराधिन रहेकाहरु लगायतले अनलाइनमा पीडीएफ फाइल गरेर वर्क परमिट अनुरोध गर्न सक्नेछन् । तर परिवार र रोजगारमा आधारित ग्रिनकार्ड आवेदन विचाराधिन रहेकाहरुले वर्क परमिटका लागि शुल्क मिनाहाको अनुरोध गर्ने हो भने अनलाइनबाट पीडीएफ फाइल नगर्न युएससीआईएसले सुझाव दिएको छ ।
त्यस्तै परिवार र रोजगारमा आधारित ग्रिनकार्ड आवेदन विचाराधिन रहेकाहरुले वर्क परमिटका लागि अनलाइनबाट पीडीएफ आवेदन दिंदा शुल्क तिरेको भएमा उक्त शुल्क रिफण्ड नगरिने पनि युएससीआईएसले जानकारी दिएको छ । यो श्रेणीमा शुल्क मिनाहा अनुरोध गर्ने हो भने कागजीरुपमा फाइल गरेर हुलाकमार्फत नै पठाउनुपर्नेछ । परिवारमा आधारित श्रेणीमा विशेष आप्रवासी बालबालिकाहरु, ग्रिनकार्ड आवेदन दिने टी वा यु भिसावाहक, दुव्र्यबहारमा परेका दम्पत्ति वा छोराछोरी, हिंशामा परेका महिलाहरु र शरणार्थीहरुमात्र वर्क परमिटको शुल्क मिनाहाका लागि योग्य हुन्छन् ।
पीडीएफ फाइलिङ विकल्प प्रयोग गर्ने आवेदकहरुले अनलाइन खाताहरूमा युएससीआईएसको अवस्थित ईफाइलिङ कार्यप्रवाह मार्फत पेश गरेको जस्तै केस व्यवस्थापन कार्यक्षमता प्राप्त गर्नेछन् । अर्थात् केस स्थिति अद्यावधिकहरू, प्रमाणका लागि अनुरोधहरूको प्राप्ति र निर्णय सूचनाहरूमा अनलाइन मार्फत पेश गरेको जस्तै केस व्यवस्थापन कार्यक्षमता हुनेछ।
यद्यपि नयाँ विकल्पले आवेदकहरूका लागि फाइलिङ विकल्पहरू विस्तार गर्दछ । व्यक्तिहरूले अझै पनि कागजी आवेदन प्याकेजहरू हुलाकमार्फत फाइल गर्न भने सक्छन्। भविश्यमा हुने पीडीएफ फाइलिङको विस्तारले वकीलहरू र मान्यता प्राप्त प्रतिनिधिहरूलाई आफ्ना ग्राहकहरूको तर्फबाट अतिरिक्त फारम प्रकारहरूका आवेदनहरू फाइल गर्न अनुमति दिने युएससीआईएसले जनाएको छ ।