प्रकाशित मिति : श्रावण १६, २०८१ बुधबार
अमेरिकाले अनियमित आप्रवासीहरूको लागि यात्रा योजना र व्यवस्था गर्न सहयोग गर्ने भिसा एजेन्सी, टुर अपरेटर र ट्राभल कम्पनीहरूका संचालकहरुलाई अमेरिकी भिसा नदिने घोषणा गरेको छ । अमेरिकामा अनियमित आप्रवासन र कमजोर यात्रुहरूको शोषणबाट लाभ उठाउनेहरूलाई अमेरिकाले दण्डित गर्ने र भिसा अस्वीकार गर्ने अमेरिकी विदेशमन्त्रालयका प्रवक्ता म्याथ्यू मिलरले जनाएका छन् ।
अमेरिकाले अध्यागमन र राष्ट्रियता ऐनको धारा २१२ (ए) (३) (सी) अन्तर्गत भिसा प्रतिबन्ध नीतिलाई यसै महिना विस्तार गरेको हो । जसले अमेरिकामा अनियमित आप्रवासन र कमजोर आप्रवासीहरूको शोषणबाट लाभ उठाउने व्यक्तिहरूलाई भिसा जारी गर्न प्रतिबन्ध लगाउँदछ। विस्तारित नीति ट्राभल एजेन्सीहरू र टुर अपरेटरहरूका अधिकारीहरूमा पनि लागू गरिएको हो । जसले मुख्य रूपमा अमेरिकामा अनियमित आप्रवासीहरूका लागि डिजाइन गरिएको यात्रा सेवाहरू प्रदान गर्दछन् ।
विस्तारित नीतिलाई लागु गर्ने क्रममा अमेरिकाले सरकारी र निजी क्षेत्रको सहकार्यमा पश्चिमी गोलार्ध भित्र र बाहिर शोषणकारी अभ्यासहरू उन्मूलन गर्न फराकिलो अभियानको भागको रूपमा बेइमान यातायात अधिकारीहरू विरुद्ध भिसा प्रतिबन्धहरू लगाउन पनि जारी राख्ने बताएको छ । जोखिममा रहेका आप्रवासीहरूबाट तस्करहरू, निजी कम्पनीहरू, सार्वजनिक अधिकारीहरू वा अरू कसैले पनि फाइदा लिन नहुने अमेरिकी विदेश मन्त्रालयले जनाएको छ ।
गत फेब्रुअरीमा घोषणा गरिएको विदेशमन्त्रालयको नीतिलाई विस्तार गर्दै भिसा एजेन्सी, टुर अपरेटर र ट्राभल एजेन्सीहरुमा पनि लागु गरिएको हो । फेब्रुअरीमा घोषणा गरिएको नीतिले अध्यागमन र राष्ट्रियता ऐनको धारा २१२ (ए) (३) (सी) अन्तरगतको २०२३ नोभेम्बरको अघिल्लो नीतिलाई हटाएर नयाँ नीति लागु गरेको थियो । यस अगाडिको नीतिले जमिन, समुद्री वा चार्टर विमानबाट यातायात प्रदान गर्ने कम्पनीका वरिष्ठ अधिकारीहरूलाई लक्षित गरेको थियो भने अब ट्राभल एजेन्सीहरू र टुर अपरेटरहरूका वरिष्ठ अधिकारीहरूलाई पनि समेट्नेछ।
