प्रकाशित मिति : ११ फाल्गुन २०८२, सोमबार
अमेरिकामा हलिउडका चर्चित निर्देशक रोब राइनरका छोरा निक राइनरले आफू निर्दोष भएको बताएका छन्। उनीमाथि आफ्ना बुबा-आमाको हत्या गरेको आरोप लागेको छ। उनले अदालतसमक्ष आफू निर्दोष रहेको दाबी गरेका हुन्।
३२ वर्षीय निक राइनर लस एन्जलसको अदालतमा उपस्थित भई अभियोगमा सफाइ पेश गरेका हुन्। गत डिसेम्बर महिनामा ब्रेन्टउड क्षेत्रमा रहेको उनीहरूको निवासमा उनका बुबा-आमा धारिलो हतियारले पटक-पटक प्रहार गरिएको अवस्थामा मृत फेला परेका थिए।
अदालतमा उपस्थित हुँदा उनले कारागारको खैरो पोसाक लगाएका थिए। दोषी ठहरिएमा उनलाई बिनासर्त आजीवन कारावास वा मृत्युदण्डसम्मको सजाय हुन सक्ने कानुनी व्यवस्था छ। अभियोजन पक्षका अनुसार उनले आफ्ना पिता र आमा मिशेलमाथि घरको शयनकक्षभित्र धारिलो हतियार प्रयोग गरी आक्रमण गरेका थिए र त्यसपछि उनी त्यहाँबाट फरार भएका थिए।
हाल उनी प्रहरी हिरासतमा छन्। उनलाई आगामी २९ अप्रिलमा पुनः अदालतमा उपस्थित गराइने जनाइएको छ। ७८ वर्षीय रोब राइनर र ७० वर्षीया मिशेल सिंगर राइनरलाई गत १४ डिसेम्बरमा उनीहरूकी छोरीले घरमै मृत अवस्थामा फेला पारेकी थिइन्। चिकित्सकीय परीक्षण प्रतिवेदनअनुसार उनीहरूको मृत्यु धारिलो हतियारको गम्भीर चोटका कारण भएको पुष्टि गरिएको छ।
निक राइनरलाई घटनाकै दिन पक्राउ गरिएको थियो। सञ्चारमाध्यमहरूका अनुसार घटना हुनु अघिल्लो साँझ उनी र उनका पिता एक कार्यक्रममा सहभागी भएका थिए, जहाँ उनीहरूबीच विवाद भएको थियो। उनविरुद्ध पहिलो दर्जाको दुईवटा हत्या अभियोग दर्ता गरिएको छ, जसमा एकभन्दा बढी व्यक्तिको हत्या गरिएको विशेष परिस्थिति समावेश छ।
रोब राइनर चर्चित चलचित्र निर्देशक थिए भने मिशेल सिंगर राइनर अभिनेत्री, छायाचित्रकार तथा निर्माता थिइन्। उनीहरूले स्थापना गरेको ‘राइनर लाइट’ नामक छायाचित्र तथा निर्माण संस्था पनि परिचित मानिन्छ। उनीहरूका सन्तान जेक र रोमीले जारी गरेको वक्तव्यमा बुबा-आमाको “डरलाग्दो र विनाशकारी क्षति” पछि आफूहरू अकल्पनीय पीडामा रहेको बताएका छन्।
निक राइनरको प्रारम्भिक सुनुवाइ जनवरी महिनामा तय गरिएको भए तापनि उनका कानुनी प्रतिनिधि एलन ज्याक्सन मुद्दाबाट अलग भएपछि सुनुवाइ स्थगित भएको थियो। हाल उनलाई सरकारी खर्चमा कानुनी सहयोग उपलब्ध गराइएको छ।