प्रकाशित मिति : १ श्रावण २०८३, शुक्रबार
अमेरिकी विदेश मन्त्रालय । (आधिकारिक विदेश मन्त्रालयको तस्बिर लिन्डा डी एपस्टाइन)
अमेरिकी विदेश मन्त्रालयले आफ्नो भिसा अन्तर्वार्ता सम्बन्धी नियमलाई थप कडा र स्पष्ट पारेको छ। नयाँ नियम अनुसार अब अधिकांश आप्रवासी र गैर-आप्रवासीभिसा आवेदकहरूले आफ्नो नागरिकता वा स्थायी बसोबास भएको देशमै अन्तर्वार्ताको समय बुक गर्नुपर्नेछ। मानवीय, चिकित्सा, कूटनीतिक र परराष्ट्र नीतिसँग सम्बन्धित मामिलाहरूमा मात्रै विशेष परिस्थितिमा यसमा छुट दिइनेछ।
जुलाई १५ मा गरिएको यो अपडेट डिसेम्बर २०२५ मा जारी गरिएको निर्देशिकाकै विस्तारित रूप हो। विश्वभरका अमेरिकी दूतावास र कन्सुलरहरूले भिसा प्रक्रियालाई एउटै मापदण्डमा सञ्चालन गरून् भन्ने उद्देश्यले यो कदम चालिएको मन्त्रालयले जनाएको छ। यो नयाँ नीतिले पर्यटक, विद्यार्थी र अस्थायी कामदार लगायतका सबै प्रकारका आप्रवासी र गैर-आप्रवासी भिसा आवेदकहरूलाई असर गर्नेछ।
आप्रवासी भिसाका आवेदकहरूको हकमा नेशनल भिसा सेन्टरले आवेदकको बसोबास रहेको देशमा वा अनुरोध गरिएको खण्डमा उनीहरूको नागरिकता भएको देशमा अन्तर्वार्ता तय गर्ने मन्त्रालयले जनाएको छ। यो परिवर्तन नोभेम्बर १, २०२५ देखि नै लागू भइसकेको छ। नियमित अमेरिकी भिसा सेवा उपलब्ध भएका देशहरूमा बस्ने नागरिकका साथै नियमित सेवा स्थगित वा अनुपलब्ध भएका कारण तोकिएका अन्य प्रशोधन केन्द्र प्रयोग गर्नुपर्ने आवेदकहरूको हकमा पनि यो नियम लागू हुनेछ।
विदेश मन्त्रालयका अनुसार हाल तय भइसकेका आप्रवासी भिसाका अन्तर्वार्ताहरू सामान्यतया रद्द वा परिवर्तन हुने छैनन्। यदि नेशनल भिसा सेन्टरले अन्तर्वार्ता तय गरिसकेपछि कसैले आफ्नो कन्सुलर क्षेत्र वा देश परिवर्तन गर्न चाहेमा अमेरिकी दूतावास वा कन्सुलरमा नभई सिधै नेशनल भिसा सेन्टरमा सम्पर्क गर्नुपर्नेछ।
परिमार्जित निर्देशिकामा यो पनि उल्लेख छ कि यदि कुनै आवेदकले आफ्नो तोकिएको कन्सुलर क्षेत्र वा नागरिकता भएको देश बाहेक अन्य ठाउँमा अन्तर्वार्ता लिन चाहेमा नेशनल भिसा सेन्टरले उनीहरूको बसोबास प्रमाणित गर्न वा छुट दिन योग्य भए नभएको यकिन गर्न थप कागजातहरू माग्न सक्नेछ। मानवीय वा चिकित्सा सम्बन्धी आपत्कालीन अवस्था वा परराष्ट्र नीतिका कारण विरलै अवस्थामा मात्र यस्तो छुट दिइने मन्त्रालयले प्रष्ट पारेको छ।
गैर-आप्रवासी भिसाका आवेदकहरूले पनि आफ्नो नागरिकता वा बसोबास भएको देशकै अमेरिकी दूतावास वा कन्सुलरमा अन्तर्वार्ताको समय बुकिङ गर्नुपर्नेछ। अमेरिकाले नियमित गैर-आप्रवासी भिसा सेवा सञ्चालन नगरेका देशका नागरिकहरूले भने तोकिएका अन्य प्रशोधन केन्द्रहरूमा आवेदन दिनुपर्नेछ।
मन्त्रालयले सचेत गराउँदै भनेको छ ,”यदि कसैले आफ्नो नागरिकता, बसोबास भएको देश वा तोकिएको केन्द्र बाहिर अन्तर्वार्ता तय गरेमा, उनीहरूले लामो समय पर्खनुपर्ने हुन सक्छ र भिसा स्वीकृत हुने प्रक्रिया पनि थप कठिन हुन सक्छ। साथै, त्यस्ता आवेदनहरूका लागि तिरिएको शुल्क फिर्ता वा अन्यत्र स्थानान्तरण गरिने छैन।”
बसोबासका आधारमा आवेदन दिने आवेदकहरूले आफू सोही देशमा बसोबास गरिरहेको प्रमाण पेस गर्न सक्षम हुनुपर्नेछ। हाल तय भइसकेका गैर-आप्रवासी भिसाका अन्तर्वार्ताहरू सामान्यतया रद्द हुने छैनन्, यद्यपि केही विशेष मामिलामा अपोइन्टमेन्ट फिर्ता लिइएमा सम्बन्धित कन्सुलरले आवेदकहरूलाई सूचित गर्न सक्नेछन्।
यो गैर-आप्रवासी निर्देशिका ए, जी, सी-टु, सी-थ्री, वा नेटो भिसा आवेदकहरू, कूटनीतिक वा सरकारी प्रकारका भिसाहरू, वा संयुक्त राष्ट्र संघको मुख्यालय सम्झौता अन्तर्गत पर्ने यात्रुहरूको हकमा भने लागू हुने छैन।
विदेश मन्त्रालयले यो परिवर्तन आगामी वर्षहरूमा डाइभर्सिटी भिसा आवेदकहरूको हकमा पनि लागू गरिने जनाएको छ। आवेदकहरूलाई सेवा, आवश्यकता र सञ्चालन स्थितिको बारेमा सबैभन्दा पछिल्लो जानकारीका लागि सम्बन्धित दूतावास र कन्सुलरको वेबसाइटहरू हेर्न सल्लाह दिइएको छ।
यसअघि २०२५ को सूचनाले नै गैर-आप्रवासी भिसा आवेदकहरूलाई उनीहरूको नागरिकता वा बसोबासको देशमा अन्तर्वार्ता लिन अनिवार्य गरिसकेको थियो र नियमित भिसा सेवा नभएका देशहरूका लागि निश्चित केन्द्रहरू तोकेको थियो। जुलाई १५ को यो नयाँ अपडेटले सोही नीतिलाई थप व्यापक र स्पष्ट पार्दै भिसा प्रक्रियालाई पनि सोही बसोबास-आधारित ढाँचामा समेटेको छ र केस ट्रान्सफर तथा छुटका नियमहरूलाई अझ कडा बनाएको छ।