प्रकाशित मिति : २१ असार २०८३, आइतबार
Photo: Johannes Plenio/ Unsplash
अमेरिकाको मध्य तथा पूर्वी क्षेत्रमा केही दिनदेखि जारी अत्यधिक गर्मीका कारण न्युजर्सी राज्यमा कम्तीमा १९ जनाको मृत्यु भएको आशंका गरिएको छ। गर्मी लगत्तै आएको भीषण आँधीका कारण करिब १० लाख घर र व्यावसायिक प्रतिष्ठानहरूमा विद्युत् आपूर्ति ठप्प भएको छ।
न्युजर्सीका अधिकारीहरूका अनुसार बिहीबारदेखि नै गर्मीका कारण मानिसहरूको मृत्यु हुन थालेको हो, जसमा अधिकांश घटनाहरू राज्यको मध्य र उत्तरी भागमा भएका छन्। राज्यका स्वास्थ्य आयुक्त डा. रेनार्ड वासिङ्टनले सञ्चारकर्मीहरूलाई दिएको जानकारी अनुसार, ज्यान गुमाउने धेरैजसो व्यक्तिहरू वातानुकूलित सुविधा नभएका घरहरूमा फेला परेका थिए। केही व्यक्तिहरू घरबाहिर सडकमा र केही पार्क गरिएका गाडीभित्र मृत अवस्थामा भेटिएका थिए।
न्युजर्सीका गभर्नर मिकी शेरिलले यस पटकको मौसमलाई विगत १४ वर्षयताकै सबैभन्दा बढी गर्मीको लहर भन्दै, यसको असर ज्येष्ठ नागरिक र बिरामीलाई मात्र नभएर सबै उमेर समूहका मानिसहरूलाई परिरहेको बताए।
मौसमविद्हरूका अनुसार बिहीबार न्युयोर्कको लागुआर्डिया विमानस्थलमा अहिलेसम्मकै उच्च तापमान १०४ डिग्री फरेनहाइट (४० डिग्री सेल्सियस) रेकर्ड गरिएको छ, जसले सन् १९६६ को १०१ डिग्री फरेनहाइटको रेकर्डलाई तोडेको छ। त्यस्तै न्युजर्सीको ट्रेन्टनमा १०१ डिग्री फरेनहाइट तापक्रम पुग्यो, जसले सन् १९०१ को रेकर्डलाई पार गर्यो। नेवार्कमा १०५ डिग्री र एटलान्टिक सिटीमा शनिबार १०६ डिग्री फरेनहाइट (४१.१ डिग्री सेल्सियस) सम्म तापक्रम पुगेको थियो।
विज्ञहरूका अनुसार ‘हिट डोम’ निकै खतरनाक हुन्छ, जसले उच्च तापक्रमसँगै वायुमण्डलमा अत्यधिक ओस उत्पत्ति गर्छ। लगातारको कडा घाम र रातीको समयमा पनि तापक्रम नघट्ने भएकाले मानव शरीरले आराम पाउन सक्दैन, जसले गर्दा स्वास्थ्यमा गम्भीर असर पर्छ।
गर्मी विस्तारै पूर्वतर्फ सरेर तापक्रम केही घटे पनि लगत्तै आएको तीव्र गतिको आँधीले बिजुलीका पोल र रूखहरू ढाल्दा प्रसारण लाइनहरू अवरुद्ध भएका छन्। आइतबार दिउँसोसम्म मिसिगन, पेन्सिलभेनिया र न्युयोर्क लगायतका क्षेत्रमा करिब ९ लाख ग्राहकहरू बिजुलीविहीन भएका छन्।
विद्युत् आपूर्ति बन्द हुँदा स्थानीय बासिन्दाहरूको जनजीवन निकै प्रभावित भएको छ। कतिपय परिवारहरू घरमा पानी र बत्ती नहुँदा होटलमा बस्न बाध्य भएका छन् भने जुलाई ४ को उत्सव समेत खल्लो हुन पुगेको छ।
मौसम पूर्वानुमान महाशाखाका अनुसार यो आँधी र भारी वर्षाको क्रम अब पेन्सिलभेनिया, न्युजर्सी र न्युयोर्कतर्फ सर्ने क्रममा रहेकाले ती क्षेत्रहरूमा आकस्मिक बाढीको खतरा रहेको चेतावनी दिइएको छ।