प्रकाशित मिति : १८ असार २०८३, बिहिबार
Photo: Julia Taubitz/ Unsplash
अमेरिकाको सर्वोच्च अदालतले हालै हाइटी र सिरियाका नागरिकहरूका लागि उपलब्ध टीपीएस खारेज गर्ने ट्रम्प प्रशासनको योजनालाई अनुमति दिएको छ। यो निर्णयसँगै अमेरिकामा कार्यरत हजारौँ आप्रवासी स्वास्थ्यकर्मीहरूले देश छोड्नुपर्ने स्थिति सिर्जना भएको छ, जसले गर्दा अमेरिकी स्वास्थ्य क्षेत्रमा ठूलो हलचल सृजना भएको छ।
विज्ञहरूका अनुसार यो निर्णयले अमेरिकामा पहिलेदेखि नै चलिरहेको स्वास्थ्यकर्मीको अभावलाई अझ भयावह बनाउनेछ। विशेष गरी ज्येष्ठ नागरिक केयर सेन्टर, नर्सिङ होम र घरमै गरिने हेरचाह सेवाहरू यसबाट सबैभन्दा बढी प्रभावित हुनेछन्। धेरै अस्पतालहरूले कर्मचारी अभावकै कारण बेडहरू बन्द गर्नुपरेको अवस्था छ।
तथ्यांक अनुसार अमेरिकामा कार्यरत कुल डाक्टरहरूमध्ये झण्डै ९ प्रतिशत (५०,००० जना) र १ लाख ४५ हजार नर्सहरू गैर-नागरिक श्रेणीका छन्, जसमा टीपीएस धारकहरू पनि पर्छन्। हाइटीका मात्रै २१,००० भन्दा बढी नागरिकहरू केयरगिभर र नर्सिङ असिस्टेन्टका रूपमा फ्रन्टलाइनमा कार्यरत छन्।
डिपार्टमेन्ट अफ होमल्याण्ड सेक्युरिटीका अनुसार यी आप्रवासीहरूको वैध रूपमा काम गर्न पाउने अनुमति पत्र आउँदो जुलाई १० मा समाप्त हुँदैछ। यस अचानकको परिवर्तनले अमेरिकाभरिका आप्रवासी समुदाय र स्वास्थ्य संस्थाहरूमाझ ठूलो अन्यौलता र त्रास फैलाएको छ।