प्रकाशित मिति : १७ असार २०८३, बुधबार
Photo:Nappy/Unsplash
अमेरिकाका २५ डेमोक्र्याट नेतृत्वका राज्य र डिस्ट्रिक्ट अफ कोलम्बियाले ट्रम्प प्रशासनविरुद्ध अदालतमा मुद्दा दायर गरेका छन्। न्यून आय भएका व्यक्तिहरूका लागि सरकारी स्वास्थ्य बीमा प्राप्त गर्ने नागरिकहरूका लागि ल्याइएको ‘अनिवार्य काम गर्नुपर्ने’ नयाँ नियमको विरोधमा यो कदम चालिएको हो।
विवादको मुख्य जड शारीरिक वा मानसिक रूपमा कमजोर/अशक्त श्रेणीको नयाँ परिभाषा हो। राज्यहरूका अनुसार संघीय सरकारले यो परिभाषालाई अत्यन्तै साँघुरो बनाएको छ, जसका कारण गम्भीर बिरामी र अपाङ्गता भएका व्यक्तिहरूले मेडिकेडको सुविधा गुमाउने जोखिम बढेको छ।
राष्ट्रपति डोनल्ड ट्रम्पले एक वर्षअघि हस्ताक्षर गरेको कर तथा खर्चसम्बन्धी व्यापक कानुन ‘वान बिग ब्युटिफुल बिल एक्ट’ अन्तर्गत यो नियम ल्याइएको हो। यस नियमअनुसार मेडिकेड सुविधा पाइरहेका वयस्कहरूले बीमा कायम राख्न महिनामा कम्तीमा ८० घण्टा काम गरेको, कलेज/विद्यालय गइरहेको वा सामुदायिक सेवामा संलग्न भएको प्रमाण पेस गर्नुपर्छ।
अमेरिकी स्वास्थ्य तथा मानव सेवा विभाग र सेन्टर्स फर मेडिकेयर एन्ड मेडिकेड सर्भिसले यसै महिना जारी गरेको अन्तरिम निर्देशिकाले “मेडिकली फरेल” को दायरा घटाएको छ। डेमोक्र्याटिक एटर्नी जनरल र गभर्नरहरूले संघीय सरकारले आफूहरूसँग छलफल नै नगरी अन्तिम समयमा यो नियम थोपरेको आरोप लगाएका छन्।
अर्कोतर्फ, नयाँ नियमका समर्थकहरूले भने यो नीति लचिलो रहेको र यसले नागरिकहरूलाई आत्मनिर्भर बन्न, सीप सिक्न र नयाँ अवसरहरू सिर्जना गर्न मद्दत गर्ने दाबी गरेका छन्। सिएमएसका निर्देशक डा. मेहमत ओजले यसै महिनाको सुरुमा भनेका थिए, यो नियमले अमेरिकीहरूलाई काम, शिक्षा र तालिमका माध्यमबाट स्वतन्त्र र आत्मनिर्भर बन्न मद्दत गर्नेछ।
राज्यहरूले भने यो नियम कार्यान्वयनका लागि दिइएको अगस्ट ३१, २०२६ को समयसीमा व्यावहारिक नभएको र तोकिएको समयमा काम नसके ठुलो आर्थिक जरिवाना भोग्नुपर्ने बताएका छन्। यो नियम जनवरी १, २०२७ देखि पूर्ण रूपमा लागू गर्ने लक्ष्य राखिएको छ।