प्रकाशित मिति : ११ असार २०८३, बिहिबार
ड्रिम्स युनिभर्सल एलएलसीले मिस नेपाल नर्थ अमेरिका २०२६ का लागि शीर्ष २० प्रतिस्पर्धी घोषणा गरेको छ। यो कार्यक्रमको नवौं संस्करण हो, जसले उत्तर अमेरिकाभर रहेका नेपाली महिलाहरूको नेतृत्व, संस्कृति र उपलब्धिलाई उजागर गर्दै आएको छ।
यसपटक प्रतियोगिताको अन्तिम प्रतिस्पर्धा परम्परागत रूपमा आयोजना हुँदै आएको न्यूयोर्कबाट स्थानान्तरण गरी वासिङ्टन, डी.सी.मा गरिने भएको छ। आयोजकका अनुसार अमेरिकाको २५०औँ स्वतन्त्रता दिवसको सन्दर्भमा राष्ट्रको राजधानीमा कार्यक्रम आयोजना गर्नु नेपाली समुदायको बढ्दो उपस्थिति र योगदानलाई प्रतिबिम्बित गर्ने अवसर हो।
विभिन्न पेशा, शैक्षिक पृष्ठभूमि र अनुभवबाट आएका प्रतिस्पर्धीहरूलाई प्रतिस्पर्धात्मक प्रक्रियामार्फत छनोट गरिएको हो। यसमा अमेरिकी सेनामा कार्यरत, स्वास्थ्य तथा नर्सिङ क्षेत्रका पेशाकर्मी, पाइलट, इन्जिनियर, सूचना प्रविधि विशेषज्ञ, उद्यमी, विद्यार्थी तथा सामुदायिक अभियन्ताहरू समावेश छन्।
“मिस नेपाल नर्थ अमेरिका केवल उपाधि जित्ने प्रतिस्पर्धा मात्र होइन,” ड्रिम्स युनिभर्सल एलएलसीका अध्यक्ष शैलेन्द्र श्रेष्ठले भने, “यो युवतीहरूलाई आफ्नो क्षमता पहिचान गर्न, आत्मविश्वास बढाउन, नेतृत्व विकास गर्न र आफ्नो सांस्कृतिक पहिचानलाई गर्वका साथ अंगाल्न अवसर दिने प्लेटफर्म हो।”
प्रतियोगितामा सहभागीहरूले अन्तर्वार्ता, सांस्कृतिक प्रस्तुति, प्रतिभा प्रदर्शन तथा नेतृत्व विकाससँग सम्बन्धित गतिविधिमा भाग लिनेछन्। ग्रान्ड फिनाले जुलाई २६, २०२६ मा वासिङ्टन, डी.सी.मा आयोजना हुनेछ।
विजेताले मिस नेपाल नर्थ अमेरिका २०२६ को उपाधि, छात्रवृत्ति अवसर तथा राष्ट्रिय र अन्तर्राष्ट्रिय स्तरमा नेपाली समुदायको प्रतिनिधित्व गर्ने अवसर प्राप्त गर्नेछिन्।
शीर्ष २० प्रतिस्पर्धीहरूमा केन्टकीकी आयशा थापा, साउथ क्यारोलिनाकी अनामिका खड्गी, मिचिगनकी अनामिका श्रेष्ठ, मेरील्याण्डकी बेबिका कोइराला र दिपिका शर्मा परेका छन्।
त्यसैगरी टेक्सासकी जिया थापामगर, ओहायोकी ईशा सिंह, टेक्सासकी ज्योत्स्ना क्षेत्री, न्युयोर्ककी मोबिशा लामा र नेभाडाकी प्राप्ति श्रेष्ठ पनि छनोट भएका छन्।यस्तै टेक्सासकी प्रियाशा देवकोटा, रेश्मा निरौला, भर्जिनियाकी रिया मल्ला, रिम्शा थापा तथा न्युयोर्ककी रोज्जा खरेल पनि शीर्ष २० मा परेका छन्। सूचीमा भर्जिनियाकी रुजु गिरी, टेनेसीकी शाब्या बिष्ट, वासिङ्टन, डी.सी.की स्वोस कराखेती, भर्जिनियाकी तेरिशा बन र उपास्ना अधिकारी रहेका छन्।
कार्यक्रमसम्बन्धी थप जानकारी, टिकट तथा प्रायोजनका लागि आधिकारिक वेबसाइटमार्फत जानकारी लिन सकिने आयोजकले जनाएको छ।