प्रकाशित मिति : २७ फाल्गुन २०८२, बुधबार
इरानका नयाँ सर्वोच्च नेता मोजतबा खामेनी घाइते भएका छन्। जिम्मेवारी सम्हालेको पहिलो दिनमै अमेरिका र इजरायलले गरेको बमबारीका क्रममा उनी घाइते भएको बताइएको छ।
५६ वर्षीय खामेनीको एउटा खुट्टा भाँचिएको छ भने बायाँ आँखाको वरिपरि निलडाम परेको छ। साथै, उनको अनुहारमा सामान्य चोट समेत लागेको जनाइएको छ। यसअघि इजरायली स्रोतले पनि गत साता गरिएको हत्या प्रयासका क्रममा खामेनी घाइते भएको जानकारी दिएको थियो। केही दिनदेखि उनको स्वास्थ्य अवस्थाबारे विभिन्न हल्लाहरू फैलिरहेका थिए।
साइप्रसका लागि इरानी राजदूत अलिरेजा सालारियनका अनुसार, उक्त हवाई आक्रमणमा मोजतबाका पिता तथा पूर्व सर्वोच्च नेता आयातोल्लाह अली खामेनीको मृत्यु भएको छ। सोही आक्रमणमा परिवारका अन्य पाँच सदस्यले पनि ज्यान गुमाएको बताइएको छ।
नयाँ सर्वोच्च नेतामा नियुक्त भएको घोषणा भएदेखि मोजतबा खामेनी सार्वजनिक रूपमा देखिएका छैनन् र उनले कुनै सम्बोधन पनि गरेका छैनन्।
राजदूत सालारियनका अनुसार, चोटका कारण उनी अहिले बोल्न वा सार्वजनिक रूपमा देखिन सक्ने सहज अवस्थामा छैनन्। यद्यपि, इरानका राष्ट्रपति मसउद पेजेस्कियनका छोरा युसुफ पेजेस्कियनले खामेनी घाइते भएको सुनेको तर उनी सुरक्षित रहेको बताएका छन्।
इरानी सरकारी सञ्चारमाध्यमहरूले अहिले मोजतबा खामेनीका पुराना भिडियो र तस्बिरहरू प्रयोग गरिरहेका छन्। इरानको ‘एसेम्ब्ली अफ एक्सपर्ट्स’ ले उनलाई सर्वोच्च नेता घोषणा गरेपछि सरकारी सञ्चारमाध्यमले चार मिनेटको वृत्तचित्र सार्वजनिक गरेको थियो।
सर्वोच्च नेता बन्नुअघि मोजतबा खामेनी सार्वजनिक रूपमा निकै कम देखिने व्यक्ति थिए। तर, उनी आफ्ना पिता अली खामेनीले वर्षौंदेखि निर्माण गरेको शक्ति र प्रभावको सञ्जालमा महत्त्वपूर्ण भूमिका खेल्ने व्यक्तिका रूपमा चिनिन्थे। सन् २०२१ मा सामाजिक सञ्जालमा इरानीहरूले उनलाई भावी उत्तराधिकारीका रूपमा प्रचार गर्ने पोस्टरहरू बाँडिरहेका तस्बिरहरू पनि सार्वजनिक भएका थिए।
धार्मिक पदानुक्रममा उनी उच्च तहका धर्मगुरु नभए तापनि उनको ‘इस्लामिक रिभोलुसनरी गार्ड कोर्प्स’ र देशका शक्तिशाली आर्थिक समूहहरूसँग निकट सम्बन्ध रहेको मानिन्छ। विश्लेषकहरूका अनुसार, उनी आफ्ना पिताभन्दा पनि कठोर नीतिका समर्थक हुन सक्छन्।
यसैबीच, अमेरिकी राष्ट्रपति डोनाल्ड ट्रम्पले इरानको नयाँ सर्वोच्च नेताका रूपमा मोजतबा खामेनीको नियुक्तिलाई “अस्वीकार्य निर्णय” भन्दै आलोचना गरेका छन्।