प्रकाशित मिति : २५ फाल्गुन २०८२, सोमबार
अमेरिकाको न्यूयोर्क सिटीका मेयर जोहरान माम्दानीको घर नजिकै बम राखेको आरोपमा दुई जना पक्राउ परेका छन्। विरोध प्रदर्शनका क्रममा उनीहरूले माम्दानीको घर नजिकै विस्फोटक वस्तु फ्याँकेको आरोप लगाइएको छ।
पक्राउ पर्नेहरूमा १८ वर्षीय इमिर बालत र १९ वर्षीय इब्राहिम क्यायुमी रहेका छन्। उनीहरूमाथि आतंकवादी संगठनलाई सामग्री सहयोग पुर्याएको र घातक हतियार प्रयोग गरेको आरोप लगाइएको छ। साथै, उनीहरूविरुद्ध विस्फोटक सामग्रीको ओसारपसार, विनाशकारी उपकरणको अवैध कब्जा, र अन्तरराज्यीय विस्फोटक सामग्रीको प्राप्ति जस्ता मुद्दा दर्ता गरिएको छ।
एफबीआई र एनवाइपीडीको बम टोलीका अनुसार ती बमहरू फुटबलभन्दा केही साना थिए। ती सामग्रीलाई कालो टेपले बेरिएको थियो र भित्र बोल्ट, स्क्रू तथा फ्युजहरू राखिएका थिए। अनुसन्धानबाट ती वस्तुहरू नक्कली नभई वास्तविक “आईईडी” रहेको पुष्टि भएको छ। एनवाइपीडी कमिसनर जेसिका टिसका अनुसार यदि ती बमहरू विष्फोट भएको भए ठूलो क्षति हुने सम्भावना थियो।
पक्राउ परेका क्यायुमीलाई सोधपुछ गर्दा उनले “आईएसआईएस” बाट प्रभावित भएको स्वीकार गरेका छन्। अनुसन्धानका क्रममा उनको फोनमा आईएसआईएसका प्रचार सामग्रीहरू भेटिएको र उक्त दिनको गतिविधि आंशिक रूपमा त्यसैबाट प्रेरित रहेको खुलेको छ।
यो घटना रमजानको पवित्र महिनामा भएको थियो, जसमा करिब २० जनाको समूहले विरोध प्रदर्शन गरिरहेको थियो। घटनापछि प्रतिक्रिया दिँदै माम्दानीले न्यूयोर्क सिटीमा हिंसा भित्र्याउने जो कोही पनि कानुनअनुसार जवाफदेही हुनुपर्ने बताए।
गभर्नर क्याथी होकुलले पनि हिंसात्मक गतिविधिलाई अस्वीकार गर्दै भनिन्, “विरोध प्रदर्शन गर्ने अधिकार सबैलाई छ, तर यस्ता हिंसात्मक घटनाहरू स्वीकार्य छैनन्।”
बालत र क्यायुमी दुवैलाई हाल संघीय हिरासतमा राखिएको छ र उनीहरूलाई अप्रिल ८ मा अदालतमा उपस्थित गराइनेछ।
घटनापछि एनवाइपीडी र राज्य प्रहरीले न्यूयोर्कका संवेदनशील स्थानहरूमा सुरक्षा व्यवस्था कडा पारेका छन् र १,००० भन्दा बढी नेसनल गार्डहरू तैनाथ गरिएको छ।