प्रकाशित मिति : माघ १७, २०८२ शनिबार
नर्वेको शाही परिवार यतिबेला इतिहासकै ठूलो संकटमा परेको छ। पछिल्ला वर्षहरूकै सबैभन्दा ठूलो र संवेदनशील आपराधिक मुद्दाको सुनुवाइ ओस्लो जिल्ला अदालतमा सुरु हुँदैछ।
क्राउन प्रिन्सेस मेटे–मारिटका छोरा २९ वर्षीय मारियुस बोर्ग होइबीमाथि चार महिलालाई बलात्कार गरेकोसहित ३८ वटा गम्भीर अभियोग लागेका छन्। ती मुद्दाहरूको सुनुवाइ अब प्रारम्भ हुने भएको छ।
उनकी आमा क्राउन प्रिन्सेस मेटे–मारिट, सौतेनी बुबा तथा नर्वेको सिंहासनका उत्तराधिकारी क्राउन प्रिन्स हाकोन, साथै राजा हाराल्ड पाँचौँ र रानी सोन्या सबै यो अदालती प्रक्रियाबाट टाढा रहने भएका छन्। अदालतले आगामी सात हप्तासम्म होइबीको तस्बिर खिच्न पूर्ण प्रतिबन्ध लगाएको छ। यद्यपि, विश्वभरका सञ्चारमाध्यमहरू यतिबेला ओस्लोमा केन्द्रित भएका छन्। दरबारले भने यस मुद्दाबाट औपचारिक दूरी कायम गरेको जनाएको छ।
अभियोग र कानुनी प्रावधान अभियोगअनुसार होइबीमाथि चार महिलामाथि बलात्कार, प्रेमिकामाथि शारीरिक तथा मानसिक हिंसा, फ्ल्याट तोडफोड, लागुऔषध ओसारपसार तथा सवारी साधनसम्बन्धी अपराधहरू लागेका छन्। दोषी ठहरिएमा उनलाई १० वर्षभन्दा बढी कैद सजाय हुन सक्ने कानुनी प्रावधान छ।
चारवटै बलात्कारका अभियोगहरू सन् २०१८ देखि २०२४ नोभेम्बरसम्मका घटनासँग सम्बन्धित छन्। तीमध्ये एक अभियोगमा महिला सुतिरहेको अवस्थामा यौनसम्पर्क गरिएको उल्लेख छ, जसलाई नर्वेको कानुनअनुसार बलात्कार मानिन्छ।
आरोप र स्वीकारोक्ति होइबीले केही साना अपराधहरू भने स्वीकार गरिसकेका छन्। अभियोगमा उनले झूमर भाँच्ने, ऐना फुटाउने, भित्तामा चक्कु प्रहार गर्ने र महिलालाई अश्लील शब्दले गाली गर्ने गरेको उल्लेख छ।
अदालतमा धेरै महिलाहरूले बयान दिनेछन्, जसमध्ये हालसम्म एक जनाको मात्र नाम सार्वजनिक गरिएको छ। ती महिला पूर्वप्रेमिका तथा सामाजिक सञ्जालमा प्रभावशाली व्यक्तित्व नोरा हाउकलान्ड हुन्। उनले होइबीले आफूलाई कुटपिट गरेको, लात्ती हानेको, घाँटी थिचेको र गालीगलौज गरेको आरोप लगाएकी छन्। होइबीले भने यी गम्भीर आरोपहरू अस्वीकार गर्दै आएका छन्।
दरबारको प्रतिक्रिया र वर्तमान अवस्था क्राउन प्रिन्स हाकोनले पत्रकारसँग संक्षिप्त प्रतिक्रिया दिँदै भने, “हामी उनलाई माया गर्छौँ। तर पीडित महिलाहरू र उनीहरूको परिवारप्रति पनि हाम्रो गहिरो संवेदना छ।”
यसैबीच, क्राउन प्रिन्सेस मेटे–मारिट गम्भीर स्वास्थ्य समस्याका कारण सार्वजनिक कार्यक्रमहरूमा कमै मात्र देखिने गरेकी छन्। उनी ‘पल्मोनरी फाइब्रोसिस’ बाट पीडित छिन् र उनको फोक्सो प्रत्यारोपणको तयारी भइरहेको जनाइएको छ।
राजतन्त्रमाथिको दबाब यस घटनालाई नर्वेजियन शाही परिवारको इतिहासकै सबैभन्दा ठूलो ‘स्क्यान्डल’ का रूपमा हेरिएको छ। पछिल्ला वर्षहरूमा राजकुमारी मार्था लुइसको विवादास्पद विवाह र क्राउन प्रिन्सेस मेटे–मारिटको जेफ्री एपस्टाइनसँगको पुरानो सम्पर्कका खुलासाहरूले दरबारलाई दबाबमा पारेको थियो।
यद्यपि, यी विवादका बाबजुद नर्वेमा राजतन्त्रप्रतिको जनसमर्थन अझै बलियो देखिन्छ। पछिल्लो सर्वेक्षणअनुसार ७३ प्रतिशत नागरिकले राजतन्त्रलाई नै समर्थन गरेका छन्।