प्रकाशित मिति : पुस २०, २०८२ सोमबार
अमेरिकाले बालबालिकालाई दिइँदै आएको खोपको सङ्ख्या घटाएको छ। अमेरिकी स्वास्थ्य मन्त्रालयले अधिकांश बालबालिकाका लागि सिफारिस गरिने खोपको सङ्ख्या कटौती गर्न सुझाव दिएको हो।
स्वास्थ्य अधिकारीहरूका अनुसार दादुरा, मम्प्स र रुबेला, पोलियो, चिकनपक्स, र एचपीभी लगायतका खोपहरू भने पहिले झैँ अनिवार्य रूपमा सिफारिस गरिएको छ।
मेनिन्जोकोकल, हेपाटाइटिस ‘बी’ र हेपाटाइटिस ‘ए’ विरुद्धका खोपहरू अब मुख्य रूपमा सङ्क्रमणको उच्च जोखिममा रहेका बालबालिकाका लागि मात्र सिफारिस गरिने भएको छ। फ्लु, कोभिड–१९ र रोटाभाइरस विरुद्धको खोप भने “साझा चिकित्सकीय निर्णय” को आधारमा लगाइनुपर्ने भनिएको छ।
यसको अर्थ, यी खोप लिन चाहनेले स्वास्थ्यकर्मी वा चिकित्सकसँग अनिवार्य परामर्श गर्नुपर्ने हुन्छ। श्वासप्रश्वाससम्बन्धी भाइरस ‘आरएसभी’ विरुद्धको खोप नीतिमा भने कुनै परिवर्तन गरिएको छैन। यदि आमाले गर्भावस्थामा यो खोप नलगाएको भए शिशुलाई एक मात्रा खोप दिने सिफारिस कायमै रहनेछ।
यी परिवर्तनहरू देशभर फ्लुको सङ्क्रमण तीव्र रूपमा बढिरहेको समयमा आएका हुन्। अमेरिकी रोग नियन्त्रण तथा रोकथाम केन्द्र का अनुसार यस सिजनमा फ्लुका कारण नौ जना बालबालिकाको मृत्यु भइसकेको छ।
नयाँ अमेरिकी बाल खोप तालिका अब डेनमार्क जस्ता अन्य विकसित देशहरूको खोप तालिकासँग धेरै मिल्दोजुल्दो भएको छ। डेनमार्कमा हाल बालबालिकाका लागि रोटाभाइरस, हेपाटाइटिस ‘ए’, मेनिन्जोकोकल, फ्लु वा चिकनपक्स विरुद्धको खोप नियमित रूपमा सिफारिस गरिँदैन।
अमेरिकी स्वास्थ्य अधिकारीहरूले यी परिवर्तनहरू सुरुमा डिसेम्बरमै घोषणा गर्ने योजना बनाएका थिए। अमेरिकी खाद्य तथा औषधि प्रशासन अन्तर्गत औषधि मूल्याङ्कन तथा अनुसन्धान केन्द्रकी कार्यवाहक निर्देशक डा. ट्रेसी बेथ होएगले सीडीसीको खोप सल्लाहकार समितिलाई डेनमार्कको खोप तालिकाबारे प्रस्तुति दिएकी थिइन्।
खोपसम्बन्धी सल्लाह दिने समिति लाई गत वर्ष पुनर्गठन गरिएको थियो। लामो समयदेखि खोपप्रति सन्देह व्यक्त गर्दै आएका स्वास्थ्य मन्त्री रोबर्ट एफ. केनेडी जुनियरले अघिल्ला सबै सदस्यहरूलाई हटाएका थिए। यी परिवर्तनहरू राष्ट्रपति डोनाल्ड ट्रम्पले बाल खोप तालिकाको समीक्षा गर्न स्वास्थ्य मन्त्रालयलाई आदेश दिएको एक महिनापछि सार्वजनिक भएका हुन्।
धेरै सार्वजनिक स्वास्थ्य विज्ञहरूले यो परिवर्तनले रोक्न सकिने रोगहरूको प्रकोप बढ्न सक्ने चेतावनी दिएका छन्। जोन्स हप्किन्स ब्लूमबर्ग स्कुल अफ पब्लिक हेल्थकी महामारी विज्ञ डा. केटलिन रिभर्स भन्छिन्, “खोप तालिका घटाउँदा बालबालिका जोखिममा पर्न सक्छन् र नियन्त्रणमा रहेका रोगहरू पुनः फैलिन सक्छन्।”
डेनमार्कको खोप नीति अमेरिकाका लागि उपयुक्त नमुना नभएको डेनमार्कको स्टाटेन्स सेरम इन्स्टिच्युटका खोप सुरक्षा प्रमुख एन्डर्स ह्भीइडले बताएका छन्। उनका अनुसार “डेनमार्कमा सबैलाई गुणस्तरीय गर्भावस्था र बाल स्वास्थ्य सेवा उपलब्ध छ, तर अमेरिकामा सबैका लागि त्यस्तो अवस्था नहुन सक्छ। स्वास्थ्य सेवामा पहुँच नभएका बालबालिकाका लागि खोप अझ बढी महत्त्वपूर्ण हुन्छ।”
अर्कोतर्फ, स्वास्थ्य मन्त्रालयले खोप सिफारिस घटाउँदा स्वास्थ्य निकायप्रति जनविश्वास पुनः स्थापित हुन सक्ने र खोपप्रतिको भरोसा बढ्ने दाबी गरेको छ। धेरै खोप सिफारिस गर्दा पनि अमेरिकाको खोप दर समान स्तरका अन्य देशहरूको तुलनामा उच्च नभएको उनीहरूको तर्क छ।