१ कात्तिक, नुवाकोट । भदौ १० को बाढीले पुल बगाएपछि ठप्प बनेको नुवाकोटको ढुङ्गे बजार र त्रिशूली बजारको आवतजावत झोलुङ्गे पुल निर्माण भएपछि सहज बनेको छ ।
बाढीपछि निर्माण गरिएको पुल पूर्ण रूपमा तयार भइसकेको छैन । तर, पैदल यात्रुका लागि पुल खुला गरिएको छ । दसैँपछि पुलको निर्माण कार्य पूर्ण रूपमा सम्पन्न गर्ने तयारी छ ।
पुल बगाएपछि आवतजावतमा समस्या भोग्दै आएका स्थानीयलाई झोलुङ्गे पुल बनेसँगै केही राहत मिलेको छ । यसअघि नदी वारपार गर्न कठिनाइ भोग्दै आएका स्थानीय तथा पैदल यात्रुका लागि पुल उपयोगी बनेको छ ।
निर्माण कार्य पूरा भएपछि पुलले ढुङ्गे र त्रिशूली बजारबीचको आवतजावतलाई थप सहज बनाउने अपेक्षा गरिएको छ ।
