२१ भदौ, काठमाडौं । ठमेलमा फुटपाथमा हिँडिरहेकी युवतीलाई ‘ब्याड टच’ गर्ने युवकलाई प्रहरीले पक्राउ गरेको छ ।
पक्राउ पर्नेमा सर्लाहीको कविलासी नगरपालिका–२ घर भई हाल काठमाडौं बस्ने ३० वर्षीय सालिम साह रहेको प्रहरीले जनाएको छ । उनलाई काठमाडौं उपत्यका अपराध अनुसन्धान कार्यालयको टोलीले शनिबार राति कलंकीबाट पक्राउ गरेको जनाइएको छ ।
सामाजिक सञ्जालमा केहीदिनअघि ठमेलको फुटपाथमा हिँडिरहेकी एक युवतीमाथि ती युवकले ‘ब्याट टच’ गरेको भिडिओ भाइरल भएको थियो ।
उक्त भिडिओ भदौ १६ गते राति ८ बजेतिरहेको रहेको प्रहरीले जनाएको छ ।
सोही भिडिओका आधारमा संलग्न व्यक्ति खोज्दै जाँदा ती व्यक्ति पक्राउ परेका साह नै रहेको खुलेको जनाइएको छ ।
उनीमाथि अभद्र व्यवहार गर्न नहुने कसुरमा जिल्ला प्रहरी परिसर, काठमाडौंले अनुसन्धान गरिरहेको एसपी दानबहादुर थापाले जानकारी दिए ।